Májilis depýtattary burynǵy áriptesi Vasılıı Osıpovty eske aldy
ASTANA. Jeltoqsannyń 20-sy. QazAqparat /Aıdyn Báımen/ - QR Parlamentiniń birinshi shaqyrylymynda Májilis Tóraǵasynyń orynbasary bolǵan Vasılıı Osıpovty eske alý sharalary bolyp ótti,
dep habarlaıdy QazAqparat.
Ótken jyly dúnıeden ozǵan belgili parlamentshiniń týǵanyna bıyl jeltoqsan aıynda 70 jyl toldy. Depýtat-áriptesteri qoǵam qaıratkeri týraly ocherkter men maqalalar jazdy. Atap aıtqanda, V.Osıpovtyń azamattyq jáne qaıratkerlik qyzmeti, adamgershilik qasıeti týraly «Egemen Qazaqstan» gazetinde «Esimi eldiń esinde» aıdarymen «Jany qazaq jan edi» degen jáne «Kazahstanskaıa pravda» gazetinde «Ol jaqsylyq jasaýǵa asyqty» atty materıal jaryq kórdi.
Májilis úıinde Májilis Tóraǵasy jáne Palata jetekshisiniń orynbasarlary men depýtattardyń qatysýymen Vasılıı Ivanovıch Osıpovtyń qurmetine eske alý keshi ótti. Bul keshke V.Osıpovtyń zaıyby Valentına Petrovna, úsh uly men qyzy shaqyryldy.
Palata Tóraǵasy Oral Muhamedjanov Qazaqstannyń demokratııalyq qalyptasýy jolynda belsendi qyzmet atqarǵan, Otanymyzdyń shynaıy patrıoty bolǵan V.Osıpov jaıly aıta kelip, onyń elge sińirgen eńbegi árdaıym qurmetpen eske alynatynyn jetkizdi. Osy keshke qatysqan birinshi jáne keıingi shaqyrylym depýtattary da Vasılıı Ivanovıchtiń elimizge syıly azamat bolǵanyn, memlekettik qyzmette 50 jyldan astam abyroıly qyzmet atqarǵanyn, Qazaqstan parlamentarızminiń damýyna qosqan úlesin erekshe aıtty. Ol memlekettik tildi jetik biletindigimen erekshelengen jan edi. Osy qyry da sol keshte jıi eske alyndy.
Vasılıı Osıpov elimizge sińirgen eńbegi joǵary baǵalanyp, «Halyqtar dostyǵy», «Parasat» ordenderimen jáne birneshe medaldarmen marapattalǵan edi.
