Májilis depýtattary buqaralyq sharalar ótkizetin oryndarǵa alkogol ónimderin ákelýge tyıym salýdy usyndy
ASTANA. QazAqparat - Buqaralyq sharalar ótkizetin oryndarǵa alkogol ónimderin, sonymen birge, metall jáne shyny qutydaǵy ónimderdi ákelýge tyıym salynady.
Bul týraly búgin Májiliste «Qazaqstan Respýblıkasynyń keıbir zańnamalyq aktilerine sporttyq-buqaralyq, mádenı oıyn-saýyq jáne basqa da is-sharalar ótkizý kezinde qaýipsizdikti qamtamasyz etý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda talqylaý barysynda málim boldy.
Eske salaıyq, qujat sporttyq-buqaralyq, mádenı oıyn-saýyq jáne basqa da is-sharalaryn uıymdastyrýǵa, ótkizýge baılanysty quqyqtyq qatynastardy retteýge baǵyttalady. Bul rette sharalardy ótkizý úshin jergilikti atqarýshy organdar uıymdastyrý komıtetterin quratyn bolady. Olar sharalardy ótkizýge tartylǵan uıymdardyń qyzmetin úılestiredi. Jeke tulǵalardyń mádenıet, dene shynyqtyrý, sport salasyndaǵy quqyqtary men mindetteri aıqyndalyp, olardyń sharalarǵa barýy kezindegi tyıym salýlary men shekteýleri keńeıtiledi. Osyǵan baılanysty jeke tulǵalarǵa atalǵan sharalardaǵy minez-qulyqtyń qaǵıdalaryn buzǵany úshin ákimshilik jaýaptylyq engiziledi.
«Qujatty ekinshi oqylymǵa ázirleý barysynda depýtattar tarapynan birqatar usynystar tústi. Atap aıtqanda, buqaralyq sharalar ótkizetin oryndarǵa alkogol ónimderin, sonymen birge, metall jáne shyny qutydaǵy ónimderdi ákelýge tyıym salý usynyldy», - dedi depýtat Muhtar Tinikeev. Onyń aıtýynsha, depýtattar tarapynan stsenalar men arenalarǵa adam ómiri men densaýlyǵyna qaýip tóndiretin kez kelgen zatty laqtyrýǵa zańmen tyıym salý usynylǵan. Bul rette halyq qalaýlylary «buqaralyq nemese sporttyq-tamashalaý sharalary ótkizýge arnalǵan oryn» degen uǵymǵa ıppodromdar men tsırkterdi de jatqyzyp otyr.
Májilis maquldaǵan zań jobasy Senatqa joldanady.
