Májilis depýtattary bilim berý mekemelerine júrgiziletin tekseristi «esten tandyrarlyq» dep baǵalady
ASTANA. QazAqparat - Bilim berý mekemelerinde bolatyn tekseristerdi «esten tandyrarlyqtaı» dep baǵalaýǵa bolady. Búgin Májilistiń Áleýmettik-mádenı damý komıtetiniń otyrysynda áleýmettik zertteýge súıengen depýtat Kamal Burhanov osylaı málim etti.
Toqtala keteıik, komıtet otyrysynda áleýmettik nysandardyń tekserilýi máseleleri talqylandy. Osy taqyryp aıasynda depýtat Kamal Burhanov júrgizilgen arnaıy zertteýlerdiń qorytyndysy týraly baıandady. Onyń aıtýynsha, elimizdegi áleýmettik nysandardyń tekserilýi jóninde zertteý júrgizý ońaıǵa soqpaǵan. Óıtkeni, bilim, densaýlyq jáne mádenıet nysandarynyń basshylary tarapynan tekserý túrleri, olardyń sany, tekseretin organdar men laýazymdy tulǵalar týraly aqparat alý ońaı bolmady.
«Sondyqtan biz saýalnamany anonımdi negizde júrgizýge májbúr boldyq ári tekserýshi organnan ábden teperish kórgen, erteńgi kúniniń múldem qıyndap ketetinin oılaǵan áleýmettik nysan basshylary ózderiniń aty-jónderin kórsetýden múldem bas tartty», - deıdi K.Burhanov.
Onyń sózine qaraǵanda, saýalnama elimizdiń barlyq oblystaryndaǵy bilim berý, densaýlyq saqtaý men mádenıet nysandarynyń basshylary arasynda júrgizildi.
Halyq qalaýlysy sondaı-aq: «Jasyryn negizben júrgizilgen saýalnama bilim berý salasyndaǵy tekseristerdiń esten tandyrarlyqtaı ekenin kórsetti. Jospar boıynsha jylyna 10-15 tekseris - bul resmı túrde bekitilgen jáne resmı organdar úshin jasalǵan kórsetkish. Al shyn máninde tekserýler kórsetkishi odan 2-3 esege kóp. Ondaı tekseris barysynda muǵalimder tekserýshiler talap etetin qaǵazdardy tolyq usynyp qana qoımaı, «besbarmaq tartý, qarsy alý men shyǵaryp salý» rásimderin óz moınymen kóteredi. Mundaı tekserýlerdiń uzaqtyǵy óz aldyna, eń azy 2 kúnnen bastalyp, 1,5 aıǵa jalǵasady. Bul rette muǵalimder tekserýshiler talap etetin erejeler men nusqaýlardyń barlyǵyn muntazdaı oryndap shyǵý múmkin emestigin alǵa tartady, ıaǵnı qandaı da bir buzýshylyq báribir tabylady, endeshe aıyppuldan qutylý esh múmkin emes», - dedi.
Onyń sózine qaraǵanda, tekserýlerdiń basym bóligin aýdandyq jáne oblystyq bilim berý basqarmalary júrgizedi. Al mundaı tekserýler bilim mekemelerine birneshe saǵat buryn ǵana qońyraý shalý arqyly eskertiledi. Sosyn tekserýshiler eshqandaı qyzmettik kýálikteri men tekserýge negiz bolatyn qujattardy kórsetpeıtin kórinedi.
«Tekserýshi organdar tarapynan oryn alatyn mundaı óreskel buzýshylyqtardyń ózi alaıaqtarǵa «tekserýshi» mártebesin ıelenýge ońaı jol ashatynyn ańǵarýǵa bolady», - dep túıdi depýtat.
