Májilis depýtattary Batys Qazaqstannyń jaı-kúıimen tanysýda
Májilis depýtattary aldymen oblys ákimi Altaı Kólginovtiń qabyldaýynda bolyp, onda óńirdiń ózekti máseleleri men olardy sheshý joldary talqylandy.
Kezinde Batys Qazaqstan oblysyn tórt jyl boıy basqarǵan Baqtyqoja Іzmuhambetovtiń aıtýynsha, Elbasy tapsyrmasyna sáıkes qolǵa alynǵan memlekettik baǵdarlamalardyń oryndalýy nátıjesinde óńirlerde ekonomıka alǵa basyp, halyqtyń ál-aýqaty jaqsaryp keledi. Sonyń ishinde Batys Qazaqstanda birqatar iri jobalar júzege asyryldy. Buryn on eki aýdannyń teń jartysyna qatqyl tabandy jol tartylmasa, keıingi jyldary bul baǵytta jol qurylysy qarqyndy júrgizilýde. «Nurly jol» jáne «Nurly jer» baǵdarlamalary aıasynda turǵyn úıler kóptep salynyp, ınfraqurylym tartylýda. Oblystaǵy jobalarǵa budan bylaı da Májilis depýtattary tarapynan qoldaý kórsetiletin bolady.
Oblys basshysy óńirdegi kókeıkesti máselelerdiń sheshilýine qoldaý tanytqan Májilis depýtattaryna rızashylyǵyn bildirdi. «Nurly jol» baǵdarlamasy ınfraqurylym máselelerin ońtaıly sheshýge úlken septigin tıgizýde. Batys Qazaqstanda, ásirese, jol máselesi basymdyq baǵytqa ıe. Memleket basshysynyń tapsyrmasyna sáıkes bıyl 500 km jol jóndeletin bolsa, sonyń 200 shaqyrymy - respýblıkalyq, qalǵany - jergilikti joldar. Birqatar jobalar kelesi jyly márege jetedi. Sol sekildi «Nurly jer» baǵdarlamasyna sáıkes 12 mlrd. teńgege 11 kóp qabatty turǵyn úı (barlyǵy 1600 páter, munyń 10-y Oralda, bireýi Aqsaı qalasynda), oǵan qosa segiz aýdanda turǵyn úıler salynýda. Bul, bir jaǵynan, qurylys kompanııalary men jergilikti zaýyttardyń ónimi men jumys kúshin paıdalanýǵa, ekinshi jaǵynan, turǵyn úı kezegin azaıtýǵa múmkindik beredi», dedi Altaı Kólginov.
«Biz oblysta on kún boıy bolyp, eńbek ujymdarymen, turǵyndarmen kezdesemiz, óndiris oryndary men qoǵamdyq uıymdarda bolyp, túıtkildi máseleler tóńireginde aqyldasamyz. Depýtattar zańshyǵarýshylyq jumysqa qatysýmen birge barlyq óńirdegi turǵyndardyń usynys-pikirlerin de esepke alyp, eń mańyzdylaryn respýblıkalyq deńgeıde talqylaýǵa shyǵara bilýi tıis», dedi Májilis depýtaty Pavel Kazantsev.
Búgin túske deıin Májilis depýtattary Baqtyqoja Іzmuhambetov pen Abaı Tasbolatov oblys basshysymen birge Oraldaǵy tennıs ortalyǵy men oqýshylar jáne jastar saraıynda bolyp, atalǵan nysandardyń tynys-tirshiligimen tanysty.
Depýtattar oblys ortalyǵyndaǵy óndiris oryndarymen qatar óńir aýdandarynda da bolmaq.