Májilis depýtattary azamattar úshin aqparatqa qoljetimdilikti keńeıtetin zań jobasyn ázirledi
ASTANA. QazAqparat - Májilis depýtattary azamattar úshin aqparatqa qoljetimdilikti keńeıtetin zań jobasyn ázirledi. Bul týraly búgin QR Parlamenti Májlisinde «Aqparatqa qoljetimdilik týraly» Zańnyń jobasyn tanystyrǵan Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev aıtty.
«Zań jobasynyń maqsaty memlekettik organdardyń aqparatyna jáne basqa da aqparat ıelenýshilerge qoljetimdilikti qamtamasyz etý. Bizder, ázirleýshiler nege arqa súıedik. Eń aldymen, álemdik tájirıbege. Bizderge velesıped oılap tabýdyń qajeti joq. Bizder qazirgi ýaqytta álemde bar ázirlemelerdi paıdalanýǵa tıispiz. Álem keıbir baǵyttarda alǵa shyǵyp ketti. Máselen EYDO elderi - bizder úshin baǵdar bolyp sanalady , - dedi M.Áshimbaev.
Onyń atap ótýinshe, Zań jobasynda Zań normalarynyń kúshi qoldanylatyn aqparat ıelenýshi sýbektilerdiń tizbesi men aqparatqa qol jetkizý tásilderin keńeıtý usynylady. Atap aıtqanda, QR Parlamentiniń nemese onyń palatalarynyń, QR oblysynyń, respýblıkalyq mańyzy bar qalasynyń, astanasynyń jergilikti ókildi organdarynyń ashyq otyrystaryn jáne memlekettik organdardyń jyl qorytyndysy boıynsha ótkiziletin alqa otyrystaryn ınternet-resýrstarda onlaın translıatsııalaý arqyly qamtamasyz etý usynylyp otyr.
«Aqparatqa qol jetkizý týraly» QR Zańy jobasynyń maqsaty árkimniń zańmen tyıym salynbaǵan ádispen kez kelgen aqparatty erkin alý jáne taratý jónindegi konstıtýtsııalyq quqyǵyn iske asyrý bolyp tabylady. Zań jobasynda Zań normalarynyń kúshi qoldanylatyn aqparat ıelenýshi sýbektileri tizbesi men aqparatqa qol jetkizý tásilderin keńeıtý, azamattardyń suraý salýy boıynsha aqparatty tegin berý usynylady.
