Májilis depýtattary aımaqtarda kezdesýler ótkizedi
ASTANA. 9 shilde. QazAqparat - Májilis depýtattary shilde aıynyń 9-y men 20-sy aralyǵynda elimizdiń barlyq óńirlerinde issaparda bolyp, saılaýshylarmen kezdesedi.
Bul málimetti Májilistiń baspasóz qyzmeti taratty.
Aıta ketý kerek, 30 maýsym men 2 qyrkúıek aralyǵyn qamtıtyn parlamenttik demalys kezinde Májiliste ókilderi bar úsh partııadan, ıaǵnı, «Nur Otan» HDP, sondaı-aq «Aq Jol» QDP, Qazaqstannyń Kommýnıstik halyq partııasynan saılanǵan depýtattar saılaýshylarmen kezdesýler ótkizedi. Sonymen qatar Qazaqstan halqy Assambleıasynan saılanǵan depýtattar da saılaýshylarmen kezdesetini josparlanýda.
El azamattarymen bolatyn júzdesýlerdiń negizgi taqyryby - besinshi parlamenttik shaqyrylymnyń birinshi sessııasyndaǵy depýtattyq korpýstyń zań shyǵarýshylyq qyzmeti, atqarylǵan jumystardyń qorytyndylary, sondaı-aq saılaýshylardy tolǵandyratyn máseleler.
