Májilis depýtattary aımaqtarda azamattardy jeke máselemen qabyldap jatyr
Pavlodar oblysynda depýtattar Aıgúl Nurkına, Vera Kım jáne Anatolıı Boıchın jergilikti turǵyndarmen qabyldaý ótkizý barysynda pavlodarlyqtar zııandy eńbek jaǵdaılary bar óndiriste jumys istegen zeınetkerler boıynsha normatıvtik-quqyqtyq aktilerge ózgerister engizýge qatysty máselelerdi kóterdi.
Sonymen qatar, qala turǵyndaryn «Ekinshi Pavlodar» shaǵyn aýdanynda jer asty sýlarymen jıi sý basý máselesi tolǵandyratynyn da atap ótti.
Al, Jelezın aýdanynyń turǵyndary úshin tez arada sheshýdi talap etetin negizgi problemalardy kóterdi.
Olar: jylý jelileri men qazandyq jabdyqtarynyń tozýy, 500 adamnan az halqy bar aýyldarda sapaly aýyz sýdyń bolmaýy, Aqtaý, Ozernoe, Jańabirlik, Krýpskoe, Razdelnoe, Beregovoe, Órlitóbe, Zaharovka, Aqqaıyn, Dúıseke, Petropavlovka aýyldarynda sapaly mobıldi jáne ınternet baılanysynyń bolmaýy.
Májilis depýtattary atalǵan máselelerdiń sheshimin jeke baqylaýǵa aldy.
Tereńkól aýdanynda Ivanovka jáne Peschanoe aýyldaryndaǵy sý tazartý qurylystary men sý qubyry jelilerin jańǵyrtý jáne qaıta jańartý basty máselelerdiń qatarynda bolyp otyr. Ivanovka aýylyndaǵy sý qubyry jelilerin qaıta qurý máselesin aýyl turǵyndary buryn da kóterilgen bolatyn.
Turǵyndardyń úndeýi zerdelenip, «Nur Otan» partııasynyń saılaýaldy baǵdarlamasyna engizildi.
Búgingi kúni jobalyq-smetalyq qujattama ázirlenip, saraptama júrgizilýde. Onyń aıaqtalý merzimi - 2021 jylǵy 30 shilde.
Qurylysty uıymdastyrý, smetalyq qujattama, álsiz toqty jeliler, avtomattandyrý, syrtqy jeliler jáne elektrmen jabdyqtaý boıynsha alynǵan eskertýler pysyqtalmaq.
Jobany iske asyrý merzimi 2022 jylǵa belgilengen.
Atyraý oblysynda Májilis depýtaty Dúısenbaı Turǵanovtyń qabyldaýynda turǵyndar eń aldymen jaǵymsyz ıis kózi bolyp tabylatyn býlaný alqaptaryna qatysty máselelerdi kóterdi.
Depýtat Atyraý munaı óńdeý zaýytynda bolyp, onda býlaný alqaptaryn qalpyna keltirý kiretin TAZALYQ jobasynyń iske asyrylý barysymen tanysty.
Zaýyt basshylyǵy máseleni josparlanǵan merzimde sheshýge ýáde beredi.
Sonymen qatar, atyraýlyqtar azyq-túlik baǵasyn kóterý, áleýmettik kómek kórsetý, zeınetaqy mólsherin arttyrý máselelerin kóterdi.
Almaty qalasynda Májilis depýtaty Qanat Nurov qalanyń birneshe aýdanynda azamattardy qabyldady.
Qabylaý barysynda áleýmettik turǵyn úıdi jekeshelendirý, temirjol jolaýshylar bıletterin alyp-satarlar máselesi, múmkindigi shekteýli adamdardy áleýmettik qamtamasyz etý, ońaltý ortalyqtaryn salý jáne taǵy basqa da birqatar ózekti problemalar qamtyldy.
