Májilis depýtattary avtobanǵa qarsy shyqty
ASTANA. QazAqparat - Qazaqstanǵa tsement-betondy tósemi bar joldar qajet emes. QR Indýstrııa jáne ınfraqurylymdyq damý mınıstri Jeńis Qasymbektiń atyna saýal joldaǵan Májilis depýtaty Keńes Ábsatyrov osyndaı másele kóterdi, dep habarlaıdy QazAqparat tilshisi.
«Eýropada betondy tósem birshama jaıly bolýy múmkin. Alaıda, kúrt qurlyqtyq klımaty bar Qazaqstan úshin mundaı ereksheligi bar jańa joldar kóptegen adam ólimine ákep soqtyratyn jol-kólik apattaryna ákeledi. Betondy tósemi bar joǵary jyldamdyqty mundaı joldardaǵy kóktaıǵaq saldarynan Astana-Şýche, Astana-Qaraǵandy, Almaty-Qapshaǵaı syndy jańa avtomobıl joldarynda kólik apattary turaqty oryn alyp otyrady», - dedi Ábsatyrov.
Onyń atap ótýinshe, mundaı avtomagıstraldardy kúzgi-qysqy maýsymda paıdalanýdyń eleýli kemshiligi anyqtaldy. Máselen, aıazdyń túsýimen betondy tósem muz aıdynyna aınalady.
Esterińizge salsaq, osydan bir jyl buryn «Aq jol» fraktsııasynyń depýtattary da bul máseleni kóterip, avtomobıl joldary standartyn qaıta qaraýdy usynǵan edi. Depýtattardyń saýalyna jaýap bergen mınıstrlik tsement-betondy tósemniń kóktemgi-kúzgi jáne qysqy maýsymdarda ońtústikte de, soltústik óńirde de problema týyndatatynyn moıyndaǵan bolatyn. Bul kemshilikti joıý úshin joldyń taıqaqtyǵyn joıatyn arnaıy qospa ázirleý úshin ǵylymı-zertteý jumystarynyń bastalǵanyn da málimdegen-di. Biraq, sodan beri bir jyl ótse de másele sol kúıinde qalyp otyr.
