Májilis depýtattary Atyraýdaǵy birqatar óndiris nysandaryn aralady
ATYRAÝ. QazAqparat - Atyraýǵa sapar barysynda Parlament Májilisiniń depýtattary Baqtyqoja Іzmuhambetov, Nurlan Ábdirov, Ersultan Bekturǵanov, Janat Jarasovtar birqatar óndiris nysandaryn aralady, dep habarlady «Atyraý» gazeti.
Depýtattar Atyraýda údemeli ındýstrııalyq-ınnovatsııalyq damý baǵdarlamasy aıasynda boı kótergen túıe, qoı júnin óńdeý jáne toqyma fabrıkasy men konservilengen kókónis ónimderin shyǵaratyn eńbek ujymdarymen kezdesti. Keıin Qazaqstanda alǵash ret ashylǵan «Caspian Royal Fish» kompanııasy men Atyraý kabel zaýytynyń jumysy barysymen tanysty.
Túıe, qoı júnin óńdeý jáne toqyma fabrıkasy ótken jyly telekópir barysynda iske qosyldy. Fabrıka dırektory Nazgúl Esmaqanovanyń aıtýynsha, kásiporynnyń qýaty jylyna 500 tonna júndi óndirýge jetedi.
Balamasy joq fabrıkanyń alǵashqy ónimderin kózben kórip, qyzý jumysqa kýá bolǵan depýtattar, kókónis óndirýshi «Atyraý Agro Felıks» JShS-inde boldy. Birneshe salat túrlerin jasap, ony saýda oryndaryna tasymaldap júrgen qyzmetkerler halyqtyń ónimge degen suranysynyń joǵary ekenin aıtady. Endi olar shyny ydystarǵa salynyp, konservilengen qııar men qyzanaq ónimderin shyǵarýdy josparlap otyr.
«Caspian Royal Fish» bekire tuqymdas balyq ósiretin zaýyt osydan jyl jarym buryn údemeli ındýstrııalyq-ınnovatsııalyq damý baǵdarlamasy aıasynda iske qosylǵan edi. Kúni keshe ǵana zaýyt qara ýyldyryqtyń alǵashqy on keli ónimin shyǵaryp, tutynýshylaryna jóneltti. Zaýyttyń bas balyq ósirýshisi Altynaı Súgirálıeva depýtattardy jylyna 100 tonna balyq eti men bir tonna ýyldyryq daıyndaıtyn kásiporyn jumysynan jan-jaqty habardar etti. Qazir zaýytta 40 adam eńbek etedi. Toǵandar men arnaıy ydystarda ósiriletin qorytpa, sibir jáne orys bekiresiniń ónimderi oblystan tysqary aımaqtarǵa da shyǵaryla bastaǵan.
Jumys sapary barysynda depýtattar optıkalyq-talshyqty kabel shyǵaratyn jańa zaýytta da boldy. Munaıly óńirdegi tyń jańalyq sanalatyn jobanyń negizgi maqsaty - respýblıkanyń batys aımaǵynda talshyqty-optıkalyq kabeldi ıgerý jáne óńdeý bolyp tabylady. Kabeldik ónimmen memlekettik mekemeler, kólik, telekommýnıkatsııa, munaı jáne gaz kompanııalary qamtamasyz etiledi. Joba quny - 715 mln. teńge. Bir aýysymdyq jumys ýaqytynda jobanyń qýattylyǵy - 4500 shaqyrym bolsa, úsh aýysymdyq jumys ýaqytynda 11 000 shaqyrymǵa deıin ósedi dep kútilýde. Quramynda mys qosylǵan kabel ónimderin shyǵarý úshin 2017 jylǵa qosymsha tseh qurylysy josparlanyp otyr. Oǵan qosa, dál osyndaı zaýyty bar qaraǵandylyq áriptesterimen seriktestik baılanys ornatý da oılastyrylǵan.
«Qarjyny maqsatty ıgerý mańyzdy - Bizdiń maqsatymyz jergilikti halyqpen, «Nur Otan» partııasy fraktsııa múshelerimen, máslıhat depýtattarymen, kásiporyn, óndiris ujymdarymen kezdesip, Ult josparyn, Elbasy Joldaýyn, «Máńgilik el» patrıottyq ıdeıasyn jetkizý, qabyldanyp jatqan zańdardy túsindirý. Jáne zań jobalaryna baılanysty halyqtyń oı-pikirin bilip, usynystaryn eskerý. Atyraý munaıly aımaq sanalyp kelgen óńir bolatyn. Búginde oblys aýylsharýashylyǵynyń damýyna den qoıyp otyr. «Nurly jol» baǵdarlamasy aıasynda Atyraýda joldar, medıtsınalyq mekeme syndy kóptegen áleýmettik nysandardyń qurylysy júrgizilip jatyr. Eń bastysy, bıýdjet qarjysy ýaqtyly jáne sapaly, maqsatty ıgerilýi tıis. Bul turǵyda Atyraýda jumystar bar», - dep atap ótti Parlament Májilisiniń depýtaty, halyqaralyq qorǵanys isteri jáne qaýipsizdik komıtetiniń múshesi Ersultan Bekturǵanov.
