Májilis depýtattary Atyraýda densaýlyq, bilim jáne ekologııa máselelerin talqylady
ATYRAÝ. QazAqparat - Májilis depýtaty Beıbit Mamyraev qoǵamdyq baqylaý aıasynda Atyraý oblysynyń birqatar medıtsınalyq mekemelerinde bardy, dep habarlaıdy QazAqparat Májilistiń baspasóz qyzmetine silteme jasap.
Beıbit Mamyraev turǵyndarmen áńgimelesip, dári-dármekpen jáne medıtsınalyq maqsattaǵy buıymdarmen qamtamasyz etý, dárihanalardaǵy baǵa, sondaı-aq áleýmettik salaýattylyq pen bilim jáne ekologııa máselelerine erekshe nazar aýdardy.
Kezdesýde halyq dárihanalardaǵy dári-dármekke qatysty jaǵdaıdyń jaqsarǵanyn aıtyp, birqatar máseleni kóterip, óz tilekterin bildirdi. Eń aldymen, atyraýlyqtar dárihanada kezekke turmas úshin dári-dármekterdiń bar-joqtyǵyn bilýge bolatyn biryńǵaı baılanys ortalyǵynyń joqtyǵyna alańdaýshylyq tanytty.
Turǵyndar dári-dármek baǵasyn jáne farmatsevter qajet bolǵan jaǵdaıda keńester berip, jetispeıtin dári-dármektiń balamasyn tańdaýǵa kómektesetinin aıta otyryp, dárihanalardyń qyzmeti týraly aqparattyq jumysty kúsheıtý qajettigine toqtaldy.
Taǵy bir mańyzdy másele - aımaqtardaǵy medıtsınalyq mekemelerdiń halyqqa qajetti kómek kórsetýge daıyndyǵy. Bul aımaqtyq dárihanalardy dári-dármekpen qamtamasyz etýge de, dárigerler men medıtsına qyzmetkerleriniń sanyna da qatysty.
Máselen, 20 myńǵa jýyq adam qala mańyndaǵy Jumyskerdegi emhanaǵa tirkelse, onda 6 dáriger, bir feldsher jáne 12 medbıke bar. Sonymen qatar, olarǵa jeke qorǵanys quraldarynyń úsh jıyntyǵy ǵana berilgeni anyqtaldy.
Májilis depýtaty B.Mamyraev medıtsınalyq mekemelerge jasaǵan sapary barysynda aımaqtaǵy densaýlyq saqtaýdy damytý úshin ózekti máselelerge toqtaldy. Al, jas dárigerler óz kezeginde turǵyn úımen qamtamasyz etý, jalaqyny kóterý jáne kásibı ósý qajettiligi týraly aıtty.
Sonymen qatar, Májilis depýtaty mektep, kolledj jáne joǵary oqý oryndarynyń basshylarymen birqatar kezdesýler ótkizdi. Bul birinshi kezekte jańa oqý jylyna daıyndyq týraly boldy. Al qala turǵyndary óz kezeginde úsh aýysymdy mektepter máselesin, sport ǵımarattarynyń qoljetimdiligin arttyrýdyń ózektiligin atap ótti.
Atyraý turǵyndarymen bolǵan áńgimeler olardyń qaladaǵy ekologııalyq jaǵdaıǵa alańdaýshylyq bildiretindigin kórsetti. Qoqystardy ýaqtyly jınamaý syndy problema da bar.
Jalpy aıtqanda, indetke qatysty jaǵdaı jergilikti atqarýshy organdardyń baqylaýynda jáne halyq qabyldanǵan sharalardy qoldaıdy.
Sonymen birge, Májilis depýtatynyń aıtýynsha, dári-dármekter men medıtsınalyq maqsattaǵy buıymdardy uıymdasqan túrde jetkizýdi júıeli túrde kúsheıtý qajet, sonymen qatar sanıtarlyq normalardyń mindetti saqtalýyna erekshe nazar aýdarý kerek.
