Májilis depýtattary áskerde sarbazdarmen birge jattyǵyp jatyr
Máselen, Májilis depýtaty Samat Nurtaza áskerı ómir jaıly oıymen bylaı dep bólisti.
«Tańǵy saǵat 06:00 oıandyq. Taýdyń tańy sýyq eken. Býshlattardy kıip, jattyǵýǵa kiristik. Tósek jınap, óz palatkamyzdyń jan-jaǵyn jınastyrdyq. Sýdyń qadirin osyndaı jerde biledi ekensiń. Eki bóshke sý 217 adamǵa. Tańǵy as saǵat 07:55-te. Oǵan deıin barlyǵymyz jattyǵý jasadyq. Qırap qalǵan súıekti syqyrlattyq. Ashana da jyljymaly álbette. Qaraqumyq pen botqa berip jatyr», - dedi Samat Nurtaza.
Halyq qalaýlysy ol jerde tek jattyǵyp jatpaǵanyn jetkizdi. «Áskerılerdiń ómiri jaýapkershilikpen aýyr. Jalaqylary da aıtarlyqtaı kóp emes. Shekarashylar jeke suhbatta 170 000-220 000 tg aralyǵynda jalaqy alatynyn da aıtyp qaldy. Eń qyzyǵy, teorııa júzinde shekara beketiniń jaý shapqan kezdegi ómirsheńdik ýaqyty 15 mınýt eken. ıAǵnı shekara beketiniń mindeti – jaýdy 15 mınýt ustap turý. Boldy.
Oılap qarasań, qıyn-qystaý zamanda, jaýmen bettesetin de osy shekarashylar. Aınalamyzda júrgen sarbazdardyń barlyǵy – 2003 jyly dúnıege kelgen jigitter. Naǵyz patrıottar. Kózderinde ot. Buıryqty eki aıtqyzbaı oryndaıdy. Qazaqstannyń ár aımaqtarynan jınalǵan balalar. Aqyryndap «Álimjettik» týraly sózge tartyp edim, «bizde joq», «bilmeımin», «buryn bolǵan shyǵar» degen jaýap aldym. Láıim solaı bolǵaı. Árıne, minez-qulqynan, sarbazdardyń júris-turysynan kim «lıder», kim «momyn» ekeni syrttaı baıqalady. Er-azamat ujymynyń óz atmosferasy bolatyny da anyq. Múmkindigimizshe, sarbazdardyń turmys-tirshiligi týraly jazarmyz», - dep oı bólisti.
Al depýtat Bolat Kerimbek kýrsanttarmen birge Alataýdyń shyńdaryn baǵyndyrǵanyn jetkizdi.
«Almaty shyńyn baǵyndyrdyq. 3 475 metr bıiktike shyqtyq.15,4 shaqyrym jol júrdik. 22 064 qadam júrip óttik. Densaýlyqqa paıdaly jattyǵý boldy», - dep jazdy ol áleýmettik jelidegi paraqshasynda.
Aıta keteıik, Májilis depýtattary Maksım Rojın, Bolat Kerimbek, Oljas Quspekov jáne Samat Nurtaza shekarashylarmen birge áskerı ómirdiń turmys-tirshiligimen tanysyp jatyr. Maqsat – áskerdegi jaǵdaıdy óz kózimen kórý, tanysý, bilý.
Depýttardyń áskerı ómirmen tanysý jospary 16-31 shilde aralyǵynda jalǵasady. Alǵashqy 5 kúnde olar sarbazdarmen birge jattyǵý júrgizse, qalǵan kúnderi Qytaı jáne Qyrǵyz elderimen shektesetin shekaralyq aımaqtyń tynys-tirshiligimen de tanysady.
Buǵan deıin Májilis depýtattary Almaty oblysynyń taýly aımaǵyndaǵy lagerde shekarashylarmen birge daıyndyqtan ótip jatqanyn jazǵan edik.
