Májilis depýtattary Almatydaǵy provızorlyq ortalyqtyń jumysymen tanysty
ALMATY. QazAqparat – QR Parlamenti Májilisiniń depýtattary Azat Perýashev pen Erlan Barlybaev Almatydaǵy «Suńqar» klınıkalyq ortalyǵynyń jumysymen tanysty, dep habarlaıdy QazAqparat tilshisi.
Halyq qalaýlylary karantın jaǵdaıynda jumys istep jatqan jeke klınıkanyń jumysymen tanysyp, dárigerlerdiń usynystaryn tyńdady.
Depýtat Azat Perýashevtiń aıtýynsha, búginde kóptegen jeke klınıkalar memlekettik organdardyń nazarynan tys qalǵan. «SQ-Farmatsııa» men «Áleýmettik medıtsınalyq saqtandyrý qory» bilikti dárigerler men meıirbıkeleri bar jeke medıtsınalyq mekemelerge qoldaý kórsetpegen.
Sonymen qatar, ol koronavırýspen kúres kezinde memlekettik klınıkalarda medıtsınalyq kadrlar jetispeı jatqanda jeke klınıkalar tartylmaǵanyn tilge tıek etti.
«Meniń oıymsha, bul máseleni Úkimet pen Densaýlyq saqtaý mınıstrligi sheshýi kerek. Jeke klınıkalarǵa qoldaý kórsetý qajet. Qaıta jabdyqtap, dári-dármektermen qamtamasyz etilýi tıis. Koronavırýsqa qarsy kúreske jeke klınıkalardy jumyldyrýmyz kerek. Ásirese , qazir kelesi tolqyndy kútip otyrǵanymyzda, kómek qajet bolady»,– deıdi ol
Azat Perýashev «Suńqar» onkologııalyq ortalyǵynda kúrdeli jóndeý jumystary júrgizilgenin atap ótti.
Óz kezeginde «Suńqar» onkologııalyq ortalyǵynyń bas dárigeri Baqtııar Kerimqulov depýtattarǵa ortalyq barlyq sanıtarlyq talapqa saı qyzmet atqaryp jatqanyn aıtty.
«Bizdiń ortalyq tórt bólikke bólinedi. 1 qabat ambýlatorlyq polıklınıka, onda syrttan kelgen naýqastardy qabyldaımyz. 2 qabatta reanımatsııalyq jáne operatsııa bólimi jasaqtalǵan. 3 qabatta stattsıonarlyq 10 jáne ambýlatorlyq 10 tósek orny bar, munda syrqaty orta dárejesindegi naýqastar jatady. 4 qabatta jeńil jáne ortasha aýyr deńgeıindegi naýqastarǵa arnalǵan, ol jerde 10 tósek oryny bar», - deıdi bas dáriger.
