Májilis depýtattary Almatydaǵy birqatar ınnovatsııalyq kásiporyndarda boldy
Depýtattar Q.Sátbaev atyndaǵy Qazaq ulttyq tehnologııalyq ýnıversıtetiniń tehnoparkinde «Taraz-protsess II» jobasymen tanysty, sondaı-aq Almaty jeldetkish zaýytyn, «Membrandy tehnologııalar» JShS-in aralap, taǵy birqatar ınnovatsııalyq jobalarmen tanysty»,- delingen «Tehnologııalyq damý jónindegi ulttyq agenttik» AQ-nyń baspasóz qyzmetiniń habarlamasynda.
Máselen, «Taraz-protsess II» jobasy bolat metaldy úzdiksiz balqytýdyń joǵary tehnologııasyn jasaýǵa baǵyttalǵan. Tehnopark ázirlegen tehnologııa rýda shıkizatynan bastap aqyrǵy ónim - bolatty balqytýǵa deıingi tizbektiń úzdiksiz protsesin qamtamasyz etetin bolady jáne bólimshelerdiń arasyndaǵy kólik shyǵynyna jol bermeıdi, materıal shyǵynyn - 90 paıyzǵa, - energııa shyǵynyn - 40 paıyzǵa azaıtady.
Al «Membrandy tehnologııalar» JShS membrandy tehnologııalar qoldana otyryp, sý tazartqysh qondyrǵylar jasap shyǵarady. Jańa tehnologııalar Almaty jeldetkish zaýytynda da engizilip jatyr. Qazaqstandaǵy azamattyq jáne óndiristik qurylys salasynyń qajettiliginiń 70 paıyzyn osy zaýyt qamtamasyz etip otyrǵanyn aıta ketý kerek.
«Sonymen qatar, depýtattar Mıneraldy shıkizatty keshendi qaıta óndeý ulttyq ortalyǵynda boldy. Onda asa sırek kezdesetin metall túrlerin alý qondyrǵylarynyń ilki jobalary májilismender nazaryna usynyldy», - delingen habarlamada.
Budan keıin «Innovatsııalyq tehnologııalar parki» arnaıy ekonomıkalyq aýmaǵynda depýttarǵa taǵy birneshe joba tanystyryldy. Olar: «KP Delta IT» JShS (arnaıy baılanys quraldaryn óndirýshi), «Kazakhstan Computer Grahics» JShS (kompıýterlik grafıka), «Alpha Networks» JShS (telekommýnıkatsııalyq quraldaryn óndirýshi), «Doc Co LTD» JShS (lazerlik prınterge katrdıjder óndirýshi).
«Innovatsııalyq tehnologııalar parki» arnaıy ekonomıkalyq aýmaǵynda sonymen qatar, Májilistiń ekonomıkalyq reformalar men aımaqtyq damý komıtetiniń kóshpeli otyrysy ótti. Onda joǵary tehnologııalyq jobalardy damytý, básekege qabiletti óndiris oryndaryn qurý máseleleri talqylandy.
