Májilis depýtattary Almatyda «Aqsaı» nan ónimderi kombınatynyń ujymymen kezdesti
Parlamentshilerdi «Nur Otan» partııasy AQF tóraǵasynyń birinshi orynbasary Juldyz Omarbekova men Almaty qalalyq ákimdigi men atqarýshy organdardyń ókilderi bastap alyp júrdi, dep habarlaıdy Májilistiń baspasóz qyzmeti.
Kezdesý barysynda depýtattar «100 naqty qadam» Ult jospary, «Nurly jol» memlekettik baǵdarlamasy jáne «Nur Otan» partııasynyń«Qazaqstan-2021: Birlik. Turaqtylyq. Jasampazdyq» atty saılaýaldy tuǵyrnamasynyń júzege asyrylý joldaryn túsindirdi.
Májilistegi «Nur Otan» partııasy fraktsııasynyń jetekshisi Gúlmıra Isımbaeva kombınat qyzmetkerlerine Elbasy, Partııa tóraǵasy Nursultan Nazarbaevtyń jańajyldyq quttyqtaýyndaǵy elimizde agroóndiristik salany keshendi túrde damytýdyń jańa baǵdarlamasyn jańa jyldan bastap iske qosý týraly tapsyrmasynyń asa mańyzdylyǵyn atap ótti. Bul naqty qadam sapaly ónim óndirýdi eselep kóbeıtýmen qatar, azamattardyń turmystyq ál-aýqatyn arttyratynyn da jetkizdi.
«Bul baǵytta besjúz myńnan asa sharýashylyq nysandary óz kúshterin ortaq arnaǵa biriktirýge múmkindik alady. Bizge ýaqyt talabyna oraı, jańa ınnovatsııalyq tehnologııaǵa negizdelgen, aýyl sharýashylyǵynyń barlyq ónim túrlerin óńdep, paıdalanýǵa asyratyn sońǵy úlgidegi agroónerkásiptik ındýstrııany damytýmyz qajettiligi tur. Bul jańa baǵdarlama mine, dál osy maqsatty kózdeıdi», - dedi Gúlmıra Isımbaeva.
Májilis depýtattary sonymen qatar, Almaty qalasyndaǵy asa qýatty jáne iri kásiporynnyń biri bolyp sanalatyn «Aqsaı» nan ónimderi kombınatynyń tsehtaryn aralap, jumys protsesterimen tanysty.
Kombınat bas dırektorynyń ekonomıka jáne qarjy jónindegi orynbasary Raısa Tsyganoktyń sózine qaraǵanda, bul kásiporyn óz salasy boıynsha úzdik dep tanylyp, jetken jetistikteri úshin birqatar nagradalarmen, dıplomdarmen jáne medaldarmen marapattalǵan. Sonyń ishinde, ónimderdiń joǵary sapalylyǵy úshin 2008 jyly QR Prezıdentiniń óz qolymen tabystaǵan «Altyn sapa» syılyǵy erekshe orynda tur. Kombınat osy jetistiktermen shektelip qalmaı, jańa tehnologııalardy engizý arqyly naryqqa shyǵatyn ónim túrlerin kóbeıtip, qatarynan ozyp, ásirese tutynýshylardyń rızashylyǵyna bólenip keledi.
«Aqsaı» JShS nan ónimderi kombınaty jurtqa usynylatyn ónim túrlerin arttyrý jaǵynan aldyńǵy qatardy ıelene otyryp, tehnologııalyq jaǵynan da qanatyn keńge jaıa bastady. Qazirgi ýaqytta kombınattyń oblystardaǵy fılıaldary «Aqsaı-Nan-Kókshetaý», «Aqsaı-Nan-Óskemen» iske qosylsa, Qazaqstannyń basqa da óńirlerimen osy baǵytta kelissózder júrgizilýde.
Kezdesý barysynda depýtattar «Aqsaı-nan» kombınaty qyzmetkerleriniń qoıǵan saýaldaryna jaýap berdi. Sondaı-aq, sońǵy jyldary el Parlamentinde agroónerkásiptik salany damytýǵa baǵyttalǵan birqatar jańa zańdar qabyldanǵanyn, osynyń nátıjesinde naryqtyń talaptaryna sáıkes, ekonomıka sektoryndaǵy qıyn salanyń órkendeýine quqyqtyq negizder qalanǵanyn, óz kezeginde bul qadam taýar óndirýshi kásipkerlerdi qorǵaý men qoldaýǵa arnalǵanyn atap aıtty.
«Eń bastysy, elimizde azamattardyń áleýmettik jaǵdaıyn jaqsartý jolynda úlken ister qolǵa alynýda, sondaı-aq «Nur Otan» partııasynyń qoldaýymen memlekettik deńgeıde qabyldanǵan josparlardy júzege asyrýda naqty qadamdar belgilendi. Ómirdiń barlyq salasy boıynsha partııanyń strategııalyq baǵyty aıqyn, óziniń caılaýaldy tuǵyrnamasy bar, onyń ishinde agroónerkásiptik salany damytý jónindegi jobalardy sizderdiń qatysýlaryńyzben júzege asyramyz», - dedi Gúlmıra Isımbaeva.
Osy kúni issapar barysynda depýtattar páter ıeleri kooperatıvteri men turǵynúı kommýnaldyq sharaýshylyq máseleleri arnalǵan keńeıtilgen jıynǵa qatysyp, Ál-Farabı atyndaǵy Qazaq ulttyq ýnıversıtetiniń professorlyq-ustazdar quramymen kezdesti.
