Májilis depýtattary Almaty jáne Ońtústik Qazaqstan oblystarynda jergilikti halyqpen kezdesti
ASTANA. QazAqparat - Búgin QR Parlamenti Májilisiniń depýtattary Ulasbek Sádibekov pen Qojahan Jabaǵıev Ońtústik Qazaqstan oblysynyń Arysta boldy.
Olar qaladaǵy «Arys» vagon jóndeý deposynyń jumysymen tanysyp, ujymymen kezdesti.
Júzdesý barysynda májilismender N.Nazarbaevtyń Qazaqstan halqyna arnaǵan «Qazaqstan joly - 2050: Bir maqsat, bir múdde, bir bolashaq» atty Joldaýy boıynsha túsindirý, nasıhat jumystaryn júrgizdi. Atap aıtqanda, Májilis depýtattary jumysshylarǵa Prezıdent Joldaýynyń negizgi erejeleri jaıynda baıandap, barlyq qazaqstandyqtardyń basty mindeti - Memleket basshysynyń tarıhı tapsyrmalaryn keń kólemde nasıhattaýǵa belsene atsalysý ekendigin aıtty.
Temirjol mamandary Elbasynyń strategııalyq basym baǵyttaryndaǵy ınnovatsııalyq ındýstrııalandyrý máselesine aıryqsha nazar aýdardy. Sonymen qatar, kezdesý kezinde sóz alǵan ujym belsendileri Memleket basshysynyń bastamalaryn úlken yqylaspen qoldaıtyndyqtaryn jetkizip jatty.
Sodan soń, Májilis depýtaty Ulasbek Sádibekov Arys qalasynda «Nur Otan» partııasynyń qoǵamdyq qabyldaýynda azamattardy jeke máselelerimen qabyldady.
Qala turǵyndarynyń túrli taqyryptaǵy aryz-shaǵymdaryna partııa atynan qandaı da bir kómek kórsetý, máselelerdiń sheshilýine múmkindiginshe yqpal etý maqsatynda Májilis depýtaty barlyq azamattardy zeıin qoıyp tyńdap, árbir suraqty jete talqylady.
Qabyldaý sońynda U.Sádibekov «Nur Otan» partııasynyń qoǵamdyq qabyldaýynyń júıesi bárinen buryn Qazaqstan Prezıdentiniń áleýmettik máseleler boıynsha qoıǵan mindetterin oryndaýǵa múmkindik týǵyzatynyn atap ótti.
Sonymen qatar bul kúni Májilis depýtaty Gúlmıra Isınbaeva Almaty qalasynyń Alataý aýdanynda kezdesýler ótkizdi.
Birinshi kezdesý Alataý aýdany Aqkent yqshamaýdanyndaǵy №181-shi jalpy bilim beretin mektepte ótti. Jıynǵa mekteptiń ustazdary men oqýshylary,ata-analar jáne de «Nur Otan» partııasy bastaýysh partııa uıymynyń músheleri qatysty. Kezdesý barysynda Májilis depýtatyna mektep oqýshylary «Jumyspen qamtý - 2020» baǵdarlamasy boıynsha saýaldar qoıdy.
Ekinshi kezdesý Alataý aýdany Alǵabas yqshamaýdanynda boldy. Jıynǵa mekteptiń ustazdary, «Jas Otan» JQ músheleri, shaǵyn jáne orta bıznes ókilderi, aýdan turǵyndary, qoǵamdyq uıymdar, memlekettik qyzmetkerler jáne de «Nur Otan» partııasy bastaýysh partııa uıymynyń músheleri qatysty.
Kezdesý barysynda QR Prezıdenti N.Á. Nazarbaevtyń «Qazaqstan joly - 2050: Bir maqsat, bir múdde, bir bolashaq» atty Joldaýy partııa doktrınasynyń negizgi qaǵıdalary turǵysynan talqylandy. Kezdesýde oryn alǵan ótkir jáne múddeli dıalogta el damýynyń negizgi baǵytynyń ózektiligi tilge tıek etildi, qatysýshylar jas memleketimizdiń saıası, ekonomıkalyq, áleýmettik jáne mádenı tynys-tirshiligine baılanysty máselelerdi qozǵady.
