Májilis depýtattary Almaty oblysyndaǵy mektep qurylysyn jedeldetýdi eskertti
TALDYQORǴAN. QazAqparat - Almaty oblysyndaǵy jumys saparynda Májilis depýtattary Qýanysh Sultanov pen Zaǵıpa Balıeva Eńbekshiqazaq aýdany Avat aýylyndaǵy mektep qurylysymen tanysty, dep habarlaıdy QazAqparat tilshisi.
Eldi mekendegi bilim ordasynyń 300 orynǵa arnalǵan qosalqy ǵımaraty «Nurly jol» baǵdarlamasy aıasynda salynyp jatyr. Qurylys jumystaryna ulttyq qordan 710 mln teńge bólinip otyr. Merdiger kásiporyn «Qurylysshy» JShS basshysy Sanjar Sraılovtyń málimetinshe, jumystar 2016 jyldyń maýsym aıynda bastalǵan. Qazirgi tańda olardyń 70 paıyzy oryndalǵan. Qurylysshylar nysandy 25 tamyzǵa deıin ótkizýdi josparlap otyr. Mekteptiń barlyq ǵımarattarymen tolyq tanysqan halyq qalaýlylary jumysty jedeldetý qajettigin eskertti. Sondaı-aq, memleket qarjysyna salynyp jatqan nysannyń sapasyna erekshe mán berýdi tapsyrdy.
Sapar barysynda Májilis depýtattary Eńbekshiqazaq aýdanynyń aktıvimen kezdesti. Jıyn barysynda Qýanysh Sultanov pen Zaǵıpa Balıeva Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasyn talqylap, basqa da memlekettik baǵdarlamalardyń oryndalýyna toqtaldy.
