Májilis depýtattary Aqtóbede bolashaq medıtsına mamandarymen kezdesti
AQTÓBE. QazAqparat - Parlament Májilisiniń depýtattary Marat Ospanov atyndaǵy Batys Qazaqstan memlekettik medıtsınalyq ýnıversıtetiniń 200-ge jýyq stýdentine Elbasynyń halyqqa Joldaýyn túsindirdi. Medıtsına salasynda bolatyn reformalar talqylandy, dep habarlaıdy QazAqparat tilshisi.
«Bilim berý júıesimen qatar densaýlyq saqtaý júıesi de ózgerýi tıis». Bul Elbasynyń tapsyrmasy. Máselen, 1-shildeden bastap memlekettiń, jumys berýshilerdiń, azamattardyń ortaq jaýapkershiligine negizdelgen mindetti medıtsınalyq saqtandyrý júıesi engizile bastaıdy. Búgingi jıyn barysynda, bolashaq dárigerler men oqytýshylarǵa bul júıeniń tıimdiligi túsindirildi. Parlament Májilisiniń depýtaty, tómengi palatadaǵy ekologııa máseleleri jáne tabıǵatty paıdalaný komıtetiniń tóraǵasy Gleb Şegelskıı medıtsına ýnıversıtetine kóbirek grant bólý kerektigin atap ótti. Óıtkeni, qazir munda oqyp jatqan 5000 stýdenttiń 4 myńǵa jýyǵy ózge óńirlerden. 100-den astam shetel stýdenti de bar. Olar Iran, Pákistan, Úndistannan kelip oqyp jatyr.
«Aqtóbede anestezıolog tapshy. Muny biz aýrýhanalardy aralap júrgende ańǵardyq. Jyl saıyn myńdaǵan stýdent oqý bitirip shaǵady. Alaıda, týǵan jerlerine oralady. Sondyqtan, Aqtóbe oblysynda dáriger tapshylyǵyn sheshý úshin memlekettik grantty kóbeıtý kerek dep oılaımyn»,- dedi depýtat Şegelskıı.
Al Májilis depýtaty Artýr Platonov Aqtóbe óńirine alǵash ret kelip otyr. Ol Elbasynyń halyqqa Joldaýyn túsindire kelip, stýdentterge eń kúrdeli ári jaýapty mamandyqtyń mańyzdylyǵyn atap ótti.
«Dáriger eń myqty mamandyq. Adam janynyń arashasy. Óıtkeni, aýyrǵan adam dárigerge senim artyp, kómek suraıdy. Qazirgi kúni sizderdiń bilim alyp, kásibı dáriger bolýlaryńyz úshin barlyq jaǵdaı bar. 90-jyldary elimizde shprıts tapshy bolatyn. Qazir sizderdiń jan-jaqty bilim alýyńyzǵa múmkindik zor»,- dedi Platonov.
Kezdesýde Elbasynyń dári-dármek baǵasyn retteý, medıtsınalyq kómek kórsetý sapasyn arttyryp, halyq densaýlyǵyn nyǵaıtý tapsyrmasy týraly aıtyldy. Bolashaq dárigerlerdiń ishki tártibi men oqýyna degen jaýapkershiligi de sóz boldy.
