Májilis depýtattary Aqtóbe-Orsk tasjolynyń qurylysymen tanysty
AQTÓBE. QazAqparat - Aqtóbege kelgen Májilis depýtattary búgin Aqtóbe-Orsk baǵytyndaǵy tasjoldyń qurylysymen tanysty. Eki jylǵa josparlanǵan qurylys jumysy 2018 aıaqtalady, dep habarlaıdy QazAqparat tilshisi.
Aqtóbe kelip, Áıteke bı, Hromtaý aýdandary men birneshe aýylda aralaǵan Parlament Májilisiniń depýtattary Gleb Şegelskıı, Quralaı Qaraken, Asylbek Smaǵulov búgin «Nurly jol» baǵdarlamasymen salynyp jatqan Aqtóbe-Orsk tasjolynyń qurylysymen tanysty. Eki jylǵa josparlanǵan qurylys jumystaryna respýblıkalyq bıýdjetten 3 mıllıard teńgeden astam qarjy bólingen.
«Jol qurylysy kezinde eki kópir salynyp jatyr. 8 shaqyrymdyq jol qurylysynyń jumystaryna 100-den astam adam jumyldyrylǵan. «Nur Otan» partııasy fraktsııasynyń komıssııasy toqsan saıyn qarap, qurylys jumystaryn qarap, qarjynyń tıimdi, maqsatyn jumsalýyn baqylaıdy. Sapasyn «QazAvtoJol» AQ men jol zerthanasynan únemi surap, aqparat alyp otyramyz. Tehnıkalyq baıqalaýshylar únemi qurylys basynda júredi»,- dedi Májilis Depýtaty Gleb Şegelskıı.
Aqtóbe-Orsk tasjolyna Aqtóbe oblystyq jolaýshylar kóligi jáne avtomobıl joldary basqarmasy tapsyrys berdi. Mergider «KTP» JShS qurylys materıaldarynyń bárin jergilikti óndiris oryndarynan alyp jatyr. Tek bıtým Mańǵystaýdan tasymaldanýda.
«Jol qurylysy ýaqytyly júrip jatyr. Qıyrshyq tas, qum, ballast sekildi qurylys materıaldarynyń bári jergilikti jerden alyndy. Barlyǵy 8 shaqyrymdyq joldyń 6,5 shaqyrymy bıyl paıdalanýǵa beriledi. Merdiger mekeme 3 jylǵa kepildik beredi»,- dedi Aqtóbe oblystyq jolaýshylar kóligi jáne avtomobıl joldary basqarmasynyń basshysy Aıazbaı Osmanǵalıev.
Májilis depýtattary Aqtóbege sapary kezinde «Nurly jol» baǵdarlamasymen salynyp jatqan mektep qurylysymen tanysyp, aýyl turǵyndarymen sóılesti.
«Óz saparymyzda «Bolashaqqa baǵdar: raýhanı jańǵyrý» atty Elbasy maqalasyn túsindirip júrmiz. «Nurly jol» baǵdarlamasymen salynyp jatqan qurylys jumystarmen tanysyp, halyqpen sóılestik. Hromtaý aýdynyndaǵy Bógetsaı aýylynyń turǵyndary gaz, aýyz sý máselesin kóterdi. Jergilikti ákimdik jobalyq-smetalyq qujattarynyń ázirenip jatqanyn aıtty»,- dedi Asylbek Smaǵulov. Onyń aıtýynsha, «Notarıat týraly», «Advokattyq qyzmet etý týraly» Zańdarǵa birqatar usynystar aıtylǵan.
