Májilis depýtattary Aqmola oblysynyń birneshe aýdanynyń turǵyndarymen júzdesti

ASTANA. Jeltoqsannyń 2-si. QazAqparat /Aıdyn Báımen/ - Májilis depýtattary Beken Álimjanov, Amanjol Jazın jáne Jeksenbaı Dúısebaev Aqmola oblysynyń birneshe aýdandarynda bolyp, turǵyndarmen júzdesti,

dep habarlaıdy QazAqparat.

Atap aıtqanda, Atbasar, Jaqsy, Esil jáne Jarqaıyń aýdandarynyń eńbek ujymdarymen jáne turǵyndarymen bolǵan kezdesýlerde depýtattar eldiń qazirgi jaǵdaıy týraly, qarjy daǵdarysynan shyǵý úshin jasalǵan is-sharalar jóninde áńgimelep berdi. «2010-2012 jyldarǵa arnalǵan respýblıkalyq bıýdjet týraly» zańnyń basty baǵyttary men «Jol kartasy» baǵdarlamasynyń aldaǵy jyly da jalǵasyn tabytyny jaıly túsinik berdi.

Turǵyndar bıyl jınalǵan bıdaıdyń baǵasy men ony ótkizýdiń tártibi týraly surady. Saılaýshylar avtokólik joldaryn jóndeý, jeke adamdardyń maldaryn jaıýǵa arnalǵan jaıylym kólemin ulǵaıtý, telefon baılanysyn jaqsartý máselelerin kóterdi.

Depýtattar Atbasar aýdanynyń Novoaleksandrov aýyldyq okrýginde bolǵanda, «Bastaý» JShS-niń qoı sharýashylyǵy men iri qara ustaıtyn kesheniniń jumysymen tanysty. Depýtattar aýyldyq jerlerde qazirgi talaptarǵa jaýap beretin, eldi mekenderdiń áleýmettik máselelerin de sheshýge yqpal etip otyrǵan mal sharýashylyǵyn damytý ortalyqtary qalyptasa bastaǵanyna kóz jetkizdi.