Májilis depýtattary 2010 jylǵy merzimdi baspasózge jazyldy

Elimizdiń birqatar buqaralyq aqparat quraldarynyń jetekshileri men ókilderiniń ótinishterine oraı qarasha aıynyń basynda Májilistiń Baspasóz qyzmeti bastama kóterip, depýtattarǵa merzimdi baspasózge jazylý jóninde ótinish jasaǵan bolatyn, dep habarlaıdy QazAqparat.

Onda Baspasóz qyzmeti: «Memlekettik til tek Qazaqstanda ǵana óz deńgeıinde órkendeı alatyny anyq. Al memlekettik tilde shyǵatyn basylymdar da tek elimizde ǵana oqyrmandardan qoldaý taba alady. QR Parlamenti Májilisiniń zań shyǵarý qyzmetin turaqty nasıhattap kele jatqan ulttyq basylymdar bar. Atap aıtqanda, «Egemen Qazaqstan», «Aıqyn», «Zań gazeti», «Prezıdent jáne Halyq» «Jas qazaq», «Qazaq ádebıeti», «Ana tili», «Alash aınasy», «Dala men qala», «Qazaqstan-zaman» gazetteri men «Juldyz», «Jalyn», «Parasat», «Qazaqstan áıelderi», «Densaýlyq», «Til», «Qazaq almanaǵy» jáne basqa jýrnaldar parlamentshilerdiń daýsyn halyqqa jetkizip otyr»,- deı kelip, osy basylymdarǵa jáne basqa da ózderi qalaǵan gazet-jýrnaldarǵa jazylýlaryn ótingen edi.

Osy bastamany qoldap jáne ózderiniń jyldaǵy dástúrleri boıynsha birqatar depýtattar 2010 jylǵa kóptegen gazet-jýrnaldarǵa jazylyp qoıǵandyǵyn málim etti. Sonyń biri - Májilis depýtaty Shalataı Myrzahmetov.

«Jas kezimizden gazet-jýrnal oqyp óskendik pe, baspasózge turaqty túrde jazylyp otyramyn. Shırek ǵasyr boldy «Qazaq ádebıeti», «Juldyz», «Jalyn» jýrnaldaryn aldyramyn. «Egemen Qazaqstan», «Aıqyn», «Astana aqshamy», «Dala men qala», «Alash aınasy» gazetterine jazyldym. Jubaıym «Parasat», «Qazaqstan áıelderi» jýrnaldaryn aldyryp oqyp turady, kelesi jylǵa «Juldyzdar otbasyna» da jazyldy. Jalpy, meniń ómirden túıinim, gazet-jýrnaldy, kitapty oqyǵan adamnyń rýhanı kózi ashyla túsedi»,- deıdi Májilis depýtaty Shalataı Myrzahmetov.