Májilis depýtat R. Sklıardyń ókilettigin merziminen buryn toqtatty
ASTANA. QazAqparat - Búgin Parlament Májilisiniń jalpy otyrysynda depýtat, Ekonomıkalyq reforma jáne óńirlik damý komıtetiniń tóraǵasy Roman Sklıardyń ókilettigi merziminen buryn toqtatyldy. Eske sala keteıik, jaqynda ǵana Roman Sklıar QR Ulttyq ekonomıka vıtse-mınıstri bolyp taǵaıyndalǵan edi.
Roman Sklıar Pavlodar montaj tehnıkýmyn, Pavlodar memlekettik ýnıversıtetin, Máskeý qazirgi zaman bıznes ınstıtýtyn, Qazaq quqyqtaný jáne halyqaralyq qatynastar ınstıtýtyn bitirgen. Ol ár jyldary Pavlodar qalasy memlekettik satyp alý basqarmasynyń bastyǵy, apparat basshysy, Pavlodar qalasy ákiminiń orynbasary, Astana qalasyndaǵy energetıka jáne kommýnaldyq sharýashylyq departamentiniń dırektory, Pavlodar oblysy ákimniń orynbasary, birinshi orynbasary, Qazaqstan Respýblıkasy kólik jáne kommýnıkatsııalar vıtse-mınıstri, «Qazaqstan Temir joly» UQ» AQ vıtse-prezıdenti qyzmetterin atqarǵan.
2016 jylǵy naýryz aıynan bastap Qazaqstan Respýblıkasy Parlamenti Májilisiniń depýtaty, Ekonomıkalyq reforma jáne óńirlik damý komıtetiniń tóraǵasy bolyp qyzmet etip keldi.
