Májilis densaýlyq saqtaý júıesin jetildirýge baǵyttalǵan zań jobasyn maquldady
ASTANA. QazAqparat - Búgin Májilistiń jalpy otyrysynda palata depýtattary «Halyq densaýlyǵy jáne densaýlyq saqtaý júıesi týraly» QR kodeksine ózgerister men tolyqtyrýlar engizý týraly» zań jobasy birinshi oqylymda maquldandy.
Toqtala ketetin jaıt, qoldanystaǵy atalǵan kodeks 2009 jyly qabyldanǵan bolatyn. Bul qujat halyq densaýlyǵyn saqtaýdyń barlyq qyrlaryn qamtıdy. «Alaıda, qazirgi ýaqytta densaýlyq saqtaý salasynda jańa tásilder aıqyndalyp, qoǵamdyq qatynastardy damytýdyń jańa deńgeıi de belgilenip otyr. Soǵan oraı, zańnamalyq bazany jetildirý qajettiligi týyndady», - deıdi Densaýlyq saqtaý mınıstri Salıdat Qaıyrbekova.
Osyǵan oraı, zań jobasynyń negizgi maqsaty qoldanystaǵy zańnamalyq olqylyqtardy joıý, densaýlyq saqtaý júıesin odan ári jetildirý, sonymen birge, tolymdy medıtsınalyq qyzmet kórsetýge azamattardyń konstıtýtsııalyq quqyqtaryn qamtamasyz etý bolyp tabylady.
Mınıstrdiń aıtýynsha, zań jobasy boıynsha birqatar mańyzdy máseleler qamtylyp otyr. Sonymen ishinde, ulpalar men organdardy erikti jáne aqysyz berýdi qamtamasyz etý máseleleri qarastyrylǵan.
«Búgingi kúni elimizde naýqasqa aǵza almastyrý belsendi túrde damyp keledi. Osyǵan oraı, transplantatsııa úderisin jetildirý maqsatynda, sonymen qatar, donorlar men olardyń klıentteriniń quqyǵyn qorǵaý maqsatynda gemopoetıkalyq tin jasýshylaryn transplanttaýdy retteý máselesi qarastyrylyp otyr. Onyń ishinde tiri donordan ulpa nemese organdy alý tek qana onyń jazbasha notarıaldyq kýálandyrylǵan kelisimimen júzege asatyny naqtylanady. Al gemopoetıkalyq tin jasýshalaryn alýǵa ondaı notarıaldyq kýálandyrylǵan kelisim talap etilmeıdi», - deıdi Salıdat Qaıyrbekova.
