Májilis densaýlyq saqtaý zańnamasyna túzetýlerdi maquldady
ASTANA. QazAqparat - Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasy birinshi oqylymynda maquldandy, dep habarlaıdy QazAqparat.
Zań jobasynda 11 zańnamalyq aktige, onyń ishinde «Halyq densaýlyǵy jáne densaýlyq saqtaý júıesi týraly» Kodekske, Qylmystyq jáne Qylmystyq-protsestik kodeksterge jáne Ákimshilik quqyq buzýshylyq týraly kodekske túzetýler engizý kózdelgen.
Zań jobasy mynadaı negizgi baǵyttardy qamtıdy: tegin medıtsınalyq kómektiń kepildik berilgen kóleminiń jańa modelin jáne medıtsınalyq saqtandyrý paketin engizý; medıtsınalyq uıymdarda korporatıvtik basqarý júıesin jetildirý; densaýlyq saqtaý ınfraqurylymyn damytýdyń biryńǵaı perspektıvalyq josparyn engizý; qoǵamdyq densaýlyq saqtaý máselelerin jetildirý; medıtsınalyq bilim berý jáne ǵylym júıesin jetildirý, medıtsına kadrlaryn daıarlaý sapasyn arttyrý.
QR Densaýlyq saqtaý mınıstri Eljan Birtanovtyń sózine qaraǵanda, Tegin medıtsınalyq kómektiń kepildik berilgen kólemi (TMKKK) men Mindetti áleýmettik medıtsınalyq saqtandyrýdyń (MÁMS) jańa modeli Dúnıejúzilik densaýlyq saqtaý uıymynyń halyqty densaýlyq saqtaý qyzmetterimen jappaı qamtý jónindegi ustanymdaryna sáıkes keledi. Máselen, TMKKK aıasynda medıtsınalyq kómek barlyq azamattarǵa, oralmandarǵa, QR-da turaqty turyp jatqan sheteldikter men azamattyǵy joq adamdarǵa kórsetiledi.
MÁMS júıesindegi medıtsınalyq kómek TMKKK-dan tys medıtsınalyq qyzmetterdi qamtıtyn bolady. Bul halyqtyń MÁMS júıesine qatysýyn aıtarlyqtaı yntalandyratyn bolady.
