Májilis densaýlyq saqtaý salasyndaǵy zańnamalyq bazany jetildirýge baǵyttalǵan qujatty maquldady
ASTANA. QazAqparat - Búgin Parlament Májilisiniń jalpy otyrysynda palata depýtattarymen «Halyq densaýlyǵy jáne densaýlyq saqtaý júıesi týraly» QR kodeksine ózgerister men tolyqtyrýlar engizý týraly» zań jobasy ekinshi oqylymda maquldandy.
Toqtala ketetin jaıt, qoldanystaǵy atalǵan kodeks 2009 jyly qabyldanǵan bolatyn. Bul qujat halyq densaýlyǵyn saqtaýdyń barlyq qyrlaryn qamtıdy. Alaıda qazirgi ýaqytta densaýlyq saqtaý salasynda jańa tásilder aıqyndalyp, qoǵamdyq qatynastardy damytýdyń jańa deńgeıi belgilenip otyr. Soǵan oraı, zańnamalyq bazany jetildirý qajettiligi týyndaǵan.
Bul rette zań jobasynyń negizgi maqsaty qoldanystaǵy zańnamalyq olqylyqtardy joıý, densaýlyq saqtaý júıesin odan ári jetildirý, sonymen birge tolymdy medıtsınalyq qyzmet kórsetýge azamattardyń konstıtýtsııalyq quqyqtaryn qamtamasyz etý bolyp tabylady.Osyǵan oraı, qujatta birqatar mańyzdy máseleler qamtylyp otyr. Sonymen ishinde adamnyń ulpalaryn, tinderi men aǵzasy múshelerin erikti jáne aqysyz berýdi qamtamasyz etý máseleleri qarastyrylǵan.
Budan bólek, dári-dármek aınalymy salasyndaǵy farmatsevtıkalyq ınspektorat, Qazaqstanǵa bıologııalyq belsendi qospalardy, farmakologııalyq zattardy, bıologııalyq materıaldardy ákelý úderisterin retteý, tinder men aǵza músheleriniń transplantologııasyna qatysty zań normalary jetildiriledi.
