Májilis densaýlyq saqtaý máselelerine arnalǵan zań jobasyn maquldady
ASTANA. 31 mamyr. QazAqparat - Búgin Májilis tóraǵasy Nurlan Nyǵmatýlınniń tóraǵalyǵymen ótken palatanyń jalpy otyrysynda depýtattar «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady. Endi zań jobasy Senattyń qaraýyna joldanady.
Atalǵan zań jobasyna Parlamenttiń bir top depýtattary, atap aıtqanda G. Isimbaeva, G. Seıitmaǵanbetova, S. Jalmaǵanbetova, Q. Idrısovtar bastamashylyq jasaǵan bolatyn.
Zań jobasynyń negizgi maqsaty Qazaqstan Respýblıkasynyń azamattary men oralmandardyń tegin medıtsınalyq kómektiń kepildik berilgen kólemine quqyqtaryn iske asyrýdy qamtamasyz etý bolyp tabylady. Bul rette zań jobasymen «Halyq densaýlyǵy jáne densaýlyq saqtaý júıesi týraly» jáne «memlekettik satyp alý týraly» zańyna túzetýler engizý qarastyrylǵan.
Ekinshi oqylymǵa ázirleý barysynda depýtattar tarapynan 17 eskertý jasalyp, qujattyń sapasyn jaqsartatyn osy túzetýdiń 7-eýi boıynsha kelisilgen sheshim qabyldandy.
