Májilis Bıýrosynyń otyrysynda zań jobalarynyń daıyndyǵy sóz boldy
ASTANA. Qazannyń 22-si. QazAqparat. /Aıdyn Báımen/ Búgin QR Parlamenti Májilisiniń Tóraǵasy Oral Muhamedjanovtyń jetekshiligimen Palata Bıýrosynyń kezekti otyrysy ótti,
dep habarlaıdy QazAqparat.
Halyqaralyq ister, qorǵanys jáne qaýipsizdik komıtetiniń usynýymen Palatanyń otyrysyna «Qazaqstan Respýblıkasynyń keıbir zańnamalyq aktilerine terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda talqyǵa shyǵarý jónindegi másele qaraldy.
«Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy Saýda ókildikteriniń bólimshelerin ashý týraly kelisimdi ratıfıkatsııalaý týraly», «Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy Saýda ókildikterin ózara qurý týraly kelisimdi ratıfıkatsııalaý týraly» zań jobalarymen jumys isteý odan ári jalǵasatyn boldy.
Sol sekildi Ekologııa máseleleri jáne tabıǵat paıdalaný komıteti «Jer qoınaýy jáne jer qoınaýyn paıdalaný týraly» Qazaqstan Respýblıkasy Zańynyń jobasymen jumysty jalǵastyrý jóninde usynys jasady.
Halyqaralyq ister, qorǵanys jáne qaýipsizdik komıtetine «Táýelsiz Memleketter Dostastyǵyna qatysýshy memleketterdiń shekaralyq yntymaqtastyǵy týraly konventsııany ratıfıkatsııalaý týraly» Qazaqstan Respýblıkasy Zańynyń jobasy boıynsha qorytyndy ázirleý mindeti júkteletin bolady.
