Májilis Bıýrosynyń otyrysynda zań jobalarynyń daıyndyǵy qaraldy
ASTANA. Qazannyń 22-si. QazAqparat - Búgin QR Parlamenti Májilisiniń Tóraǵasy Oral Muhamedjanovtyń jetekshiligimen Palata Bıýrosynyń kezekti otyrysy ótti.
Onda Májilistiń salalyq komıtetteriniń usynýymen aldaǵy aptada ótetin jalpy otyrystyń kún tártibine usynylatyn máseleler qaraldy.
Agrarlyq máseleler komıtetidepýtattardyń talqysyna «Qazaqstan Respýblıkasynyń keıbir zańnamalyq aktilerine sharýa (fermer) qojalyqtarynyń qyzmeti máseleleri boıynsha ózgerister men tolyqtyrýlar engizý týraly» zań jobasyn birinshi oqylymda talqyǵa salýdy usynyp otyr.
Ekonomıkalyq reforma jáne óńirlik damý komıtetiniń usynysy boıynsha «Memlekettik múlik týraly» jáne «Qazaqstan Respýblıkasynyń keıbir zańnamalyq aktilerine memlekettik múlik máseleleri boıynsha ózgerister men tolyqtyrýlar engizý týraly» zań jobalarynyń ekinshi oqylymda talqyǵa shyǵarylatyny málim boldy.
Sonymen birge Májilistiń jalpy otyrysynda Úkimetten kelip túsken birqatar jańa zań jobalaryna qorytyndy ázirleý ýaqyttary anyqtalatyn bolady. Onyń ishinde «Qazaqstan Respýblıkasyndaǵy memlekettik baqylaý jáne qadaǵalaý týraly», «Qazaqstan Respýblıkasynyń keıbir zańnamalyq aktilerine memlekettik baqylaý jáne qadaǵalaý máseleleri boıynsha ózgerister men tolyqtyrýlar engizý týraly», «Jeke tulǵalardyń keden odaǵynyń keden shekarasy arqyly qolma-qol aqsha qarajatyn jáne (nemese) aqsha quraldaryn ótkizý tártibi týraly shartty ratıfıkatsııalaý týraly», sondaı-aq «Qazaqstan Respýblıkasynyń keıbir zańnamalyq aktilerine orman sharýashylyǵy, janýarlar dúnıesi jáne erekshe qorǵalatyn tabıǵı aýmaqtar máseleleri boıynsha ózgerister men tolyqtyrýlar engizý týraly» zań jobalary bar.
Sol sekildi Bıýro otyrysynda Ekologııa máseleleri jáne tabıǵat paıdalaný komıtetiniń Shyǵys Qazaqstan oblysynda kóshpeli otyrysyn (2010 jylǵy 18-19 qarasha) ótkizý týraly másele qaraldy.
