Májilis Bıýrosynda zań jobalarynyń daıyndyǵy men kelisim komıssııasynyń usynystary qaraldy
ASTANA. Sáýirdiń 19-y. QazAqparat - Búgin QR Parlamenti Májilisiniń Tóraǵasy Oral Muhamedjanovtyń jetekshiligimen ótken Palata Bıýrosynyń otyrysynda Májilistiń jalpy otyrysyna shyǵarylatyn máseleler qaraldy,
dep habarlaıdy QazAqparat.
Búgin ótken Bıýro sheshimine sáıkes sársenbi kúngi jalpy otyrysta «Mádenıet týraly» Qazaqstan Respýblıkasy Zańyna ózgerister men tolyqtyrýlar engizý týraly» zań jobasy boıynsha Májilis pen Senat arasyndaǵy kelispeýshilikterdi eńserý jónindegi kelisim komıssııasynyń usynystary tyńdalatyn boldy.
Depýtattardyń talqysyna «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń «elektrondyq úkimetin» damytý máseleleri boıynsha ózgerister men tolyqtyrýlar engizý týraly» zań jobasy birinshi oqylymda usynyldy.
Májilistiń jalpy otyrysynyń kún tártibine «Tańbalardy halyqaralyq tirkeý týraly Madrıd kelisimine hattamany ratıfıkatsııalaý týraly» zań jobasy engiziletin boldy.
Sonymen qatar «Turǵyn úı qatynastary týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań jobasyn talqyǵa salý kózdelip otyr.
