Májilis Bıýrosynda zań jobalary men parlamentshilerdiń halyqaralyq forýmdarǵa qatysýy týraly másele qaraldy
ASTANA. Qarashanyń 6-sy. QazAqparat. /Aıdyn Báımen/ - Búgin QR Parlamenti Májilisiniń Tóraǵasy Oral Muhamedjanovtyń jetekshiligimen Palata Bıýrosynyń kezekti otyrysy ótti,
dep habarlaıdy QazAqparat.
Bıýro otyrysynda Palatanyń salalyq komıtetteriniń usynysymen Májilistiń jalpy otyrysynyń kún tártibi jobasyna shyǵarylatyn zań jobalary saralandy. Atap aıtqanda, «Bosqyndar týraly» jáne soǵan sáıkes keıbir zańnamalyq aktilerge ózgerister engizýdi kózdeıtin zań jobalary birinshi oqylymǵa shyǵarýǵa daıyn. Sonymen qatar zańdarǵa qazaqstandyq qamtý, memlekettik materıaldyq rezerv máseleleri boıynsha túzetý engiziletin jobalar da depýtattar talqysyna usynylatyn boldy.
Sol sekildi «Táýelsiz Memleketter Dostastyǵyna qatysýshy memleketterdiń eńbekshi-mıgranttary men olardyń otbasy músheleriniń quqyqtyq mártebesi týraly konventsııany ratıfıkatsııalaý týraly» zań jobasy qaraldy.
Bıýro músheleri búgin QR Parlamenti Májilisi Bıýrosynyń 2009 jylǵy 18 qyrkúıektegi qaýlysymen bekitilgen, 2009 jylǵy respýblıkalyq bıýdjet qarajaty esebinen oryndalatyn, Májilis depýtattary bastamashy bolǵan, ázirleýge jáne táýelsiz ǵylymı saraptama júrgizýge jatatyn zań jobalarynyń, sondaı-aq monıtorıng jáne áleýmettik zertteýler obektileriniń tizbesine tolyqtyrý engizý týraly máseleni qarady. Bul jóninde Májilistiń jalpy otyrysynda osy Palata Tóraǵasynyń orynbasary Jánibek Káribjanov baıandaıtyn boldy.
Bıýro otyrysynda parlamentshilerdiń halyqaralyq forýmdarǵa qatysýy týraly másele qaraldy. Onyń ishinde 21 qarashada Sankt-Peterbýrg qalasynda ótetin «Edınaıa Rossııa» partııasy HII-ceziniń jumysyna qatysý týraly, sondaı-aq 14-15 qarashada Máskeý qalasynda bolatyn Stýdenttik otrıadtar qozǵalysyna 50 jyl tolýyna arnalǵan Stýdentter otrıadtarynyń búkilreseılik sletiniń jumysyna qatysý týraly másele qaraldy.
Otyrysta Palatanyń zań shyǵarý qyzmetine qatysty jáne basqa da máseleler qaraldy.
