Májilis bıýrosynda sottardyń quzyreti qaıta qaraldy
ASTANA. QazAqparat - Búgin Qabıbolla Jaqypovtyń tóraǵalyǵymen Májilis bıýrosy ótti. Onda Palatanyń aldaǵy jalpy otyrysynda kún tártibiniń jobasy naqtylandy.
Depýtattardyń talqylaýyna «Kásiptik odaqtar týraly» zań jobasy ilespe túzetýlerimen birinshi oqylymǵa shyǵarylady.
Kún tártibiniń jobasyna Ákimshilik quqyq buzýshylyq týraly kodeks jobasy ilespe túzetýlerimen ekinshi oqylymǵa qosylyp otyr. Bul týraly QR Parlamenti Májilisi apparatynyń baspasóz qyzmetinen habarlaıdy.
Salalyq komıtettiń baıandaýynsha, Kodeks jobasy ákimshilik zańnamany eleýli túrde reformalaýǵa, ákimshilik-quqyqtyq delıkterdi naqty aıqyndaýǵa, memlekettik organdardyń ákimshilik jazalardy qoldaný jónindegi ókilettikterin aıqyndaýǵa baǵyttalǵan.
Kodeks jobasyna sáıkes ákimshilik zańnama izgilendirý, sottarǵa túsetin júktemeni azaıtý jolymen reformalanady. Osyǵan baılanysty sottardyń jáne ákimshilik quqyqbuzýshylyq týraly isterdi qaraýǵa ýákilettik berilgen organdardyń (laýazymdy adamdardyń) quzyreti qaıta qaraldy.
Endi depýtattar eki ratıfıkatsııalanatyn zań jobasyna - esirtki, psıhotroptyq zattar men olardyń prekýrsorlaryn Keden odaǵynyń keden aýmaǵy arqyly ótkizý tártibi týraly Kelisim jáne 2010 jylǵy 9 jeltoqsandaǵy QR Úkimeti men RF Úkimeti arasyndaǵy Qazaqstan Respýblıkasyna munaı jáne munaı ónimderin jetkizý salasyndaǵy saýda-ekonomıkalyq yntymaqtastyq týraly Kelisimge ózgerister engizý týraly Hattamaǵa qorytyndy ázirleý mezgilin naqtylaıtyn bolady.
