Májilis Bıýrosynda Palata otyrysynyń kún tártibi anyqtaldy
ASTANA. 6 jeltoqsan. QazAqparat - Búgin QR Parlamenti Májilisiniń Tóraǵasy Oral Muhamedjanovtyń jetekshiligimen Palata Bıýrosynyń kezekti otyrysy ótti.
Onda Májilistiń salalyq komıtetteriniń usynýymen aldaǵy aptada ótetin jalpy otyrystyń kún tártibine usynylatyn máseleler qaraldy.
Zańnama jáne sot-quqyqtyq reforma komıteti «Medıatsııa týraly» jáne soǵan sáıkes zańdarǵa túzetý engizýdi kózdeıtin zań jobalaryn birinshi oqylymda qaraýdy usyndy.
Halyqaralyq ister, qorǵanys jáne qaýipsizdik komıteti bir top zań jobalaryn jalpy otyrysqa shyǵarady. Atap aıtqanda, «Dúnıejúzilik poshta odaǵynyń Jarǵysyna Jetinshi qosymsha hattamany ratıfıkatsııalaý týraly», «Jeke tulǵalardyń keden odaǵynyń keden shekarasy arqyly qolma-qol aqsha qarajatyn jáne (nemese) aqsha quraldaryn ótkizý tártibi týraly shartty ratıfıkatsııalaý týraly», «Asbestti paıdalaný kezinde eńbekti qorǵaý týraly konventsııany (162-konventsııa) ratıfıkatsııalaý týraly», «Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy Ekibastuz GRES-2 úshinshi blogyn salý jáne keıinnen paıdalaný týraly kelisimdi ratıfıkatsııalaý týraly» zań jobalary kún tártibine engiziledi.
Agrarlyq máseleler komıteti sharýa (fermer) qojalyqtarynyń qyzmetine qatysty zań jobasyn ekinshi oqylymǵa daıyndaǵanyn málim etti.
Sondaı-aq «Múddelik qoldaý qyzmeti týraly» jáne soǵan sáıkes zańdarǵa túzetý engizýdi qarastyratyn zań jobalarymen jumysty jalǵastyrý máselesi qaraldy.
Bıýro otyrysynda Úkimetten kelip túsken jańa zań jobalary jóninde málimet jasaldy.
