Májilis bıýrosynda Qazaqstan qoǵamynyń áleýmettik jetildirilýin zańnamalyq qamtamasyz etý naqtylandy
ASTANA, 7 qyrkúıek. QazAqparat - Búgin Májilis Tóraǵasy Nurlan Nyǵmatýlınniń jetekshiligimen ótken Palata Bıýrosynda Qazaqstan qoǵamynyń áleýmettik jetildirilýin zańnamalyq turǵydan qamtamasyz etý naqtylandy, dep habarlady QR Parlamenti Májilisiniń baspasóz qyzmeti.
Osyǵan oraı salalyq komıtetterdiń baıandamalaryn tyńdaı kele Bıýro depýtattar talqylaýyna bir top zań jobalaryn usynýǵa toqtaldy. Halyqaralyq ister, qorǵanys jáne qaýipsizdik komıteti Eýrazııalyq ekonomıkalyq qoǵamdastyqqa múshe memleketterdiń ortaq saqtandyrý naryǵyn qurý týraly hattamany jáne Qazaqstan Respýblıkasynyń Úkimeti men Avstrııa Respýblıkasynyń Úkimeti arasyndaǵy Investıtsııalardy kótermeleý jáne ózara qorǵaý týraly kelisimdi ratıfıkatsııalaý týraly zań jobalarynyń birinshi kezekte talqylanatynyn habarlady.
Májilistiń Qarjy jáne bıýdjet komıteti «Mıkroqarjy uıymdary týraly» zańynyń jobasyn ilespe túzetýlerimen birge ekinshi oqylymǵa usynatyn bolady.
Bıýro otyrysynda Palatanyń Jalpy otyrysynyń kún tártibi birqatar zań jobalarymen tolyqtyrmaqshy.
Eń aldymen bul topqa elimizdiń basty qarjy qujaty toptastyrylady. Olar «2013-2015 jyldarǵa arnalǵan respýblıkalyq bıýdjet týraly» jáne Qazaqstan Respýblıkasynyń Ulttyq qorynan 2013-2015 jyldarǵa arnalǵan kepildendirilgen transfert týraly» Zańynyń jobalary boıynsha qorytyndy ázirleý máselesi kiredi. Osy topqa «Qazaqstan Respýblıkasynyń Bıýdjet kodeksine bıýdjetti josparlaý jáne onyń atqarylý protsesin jetildirýdiń keıbir máseleleri boıynsha ózgerister men tolyqtyrýlar engizý týraly» Zańynyń jobasy boıynsha da qorytyndy ázirleý qosylady.
Osy atalǵan qujattardyń bárine Palatanyń Qarjy jáne bıýdjet komıteti jetekshilik etedi. Al, Zańnama jáne sot-quqyqtyq reforma komıteti keıbir zańnamalyq aktilerine memlekettiń kepildik berilgen zań kómegin usynýy júıesin jetildirý máseleleri boıynsha ózgerister men tolyqtyrýlar engizý týraly Zań jobasy boıynsha qorytyndy ázirleý jóninde usynys engizedi. Atalǵan komıtet «Qazaqstan Respýblıkasynyń keıbir zańnamalyq aktilerine qarjy-ekonomıkalyq qylmystardy odan ári qylmystyq sıpattan aryltý máseleleri boıynsha ózgerister men tolyqtyrýlar engizý týraly» Zańynyń jobasy boıynsha qorytyndy ázirleýmen de aınalysatyn bolady.
