Májilis bıýrosynda Elbasynyń «Qazaqstan-2050» Strategııasy - qalyptasqan memlekettiń jańa saıası baǵyty» atty Qazaqstan halqyna Joldaýyn túsindirý jónindegi is-sharalar jospary qabyldandy
ASTANA. 21 jeltoqsan. QazAqparat - Búgingi Májilis Bıýrosynda Qazaqstan Respýblıkasynyń Prezıdenti - Elbasy N.Á.Nazarbaevtyń «Qazaqstan-2050» Strategııasy - qalyptasqan memlekettiń jańa saıası baǵyty» atty Qazaqstan halqyna Joldaýyn túsindirý jónindegi Qazaqstan Respýblıkasy Parlamenti Májilisiniń is-sharalar jospary týraly qaýly qabyldandy.
Bul týraly palatanyń baspasóz qyzmetinen habarlady.
Bıýro sheshimimen qańtardyń ekinshi onkúndiginde atalǵan Joldaýdy taldap túsindirý maqsatynda Májilis depýtattary aımaqtarǵa baratyn boldy.
Sondaı-aq Májilis Bıýrosynda aldaǵy ótetin depýtattardyń jalpy otyrysynda qaralatyn kún tártibi naqtylandy.
Ekonomıkalyq reforma jáne óńirlik damý komıtetiniń usynysymen kún tártibiniń jobasyna arnaıy ekonomıkalyq aımaqtar máseleleri boıynsha ózgerister men tolyqtyrýlar engizý týraly zań jobasyn birinshi oqylymǵa qosyp otyr.
Osy komıtettiń bergen aqparatymen keıbir zańnamalyq aktilerine básekelestik máseleleri boıynsha zańnama ekinshi oqylymǵa depýtattar talqylaýyna shyǵarylatyn bolady.
Parlamentshilerdiń qaraýyna Áleýmettik-mádenı damý komıteti áleýmettik qamsyzdandyrý máseleleri boıynsha zań jobasyn ilespe túzetýlerimen ekinshi oqylymǵa usynatyn bolady.
Parlament Májilisiniń tóraǵasy Nurlan Nyǵmatýlın salalyq komıtetterge osy máselelermen muqııat jumys jasaýdy tapsyrdy.
