Májilis Bıýrosynda daıyn zań jobalarynyń talqyǵa shyǵarylatyny belgili boldy
ASTANA. 21 mamyr. QazAqparat - 20 mamyr kúni QR Parlamenti Májilisiniń tóraǵasy Oral Muhamedjanovtyń jetekshiligimen ótken Palata Bıýrosynyń otyrysynda aldaǵy aptada jalpy otyrysta talqyǵa shyǵarylatyn máseleler saralandy.
Palatanyń Halyqaralyq ister, qorǵanys jáne qaýipsizdik komıteti birneshe zań jobasyn depýtattardyń talqysyna shyǵarylatynyn habarlady. Atap aıtqanda, «Qazaqstan Respýblıkasynyń Úkimeti men Frantsýz Respýblıkasynyń Úkimeti arasyndaǵy Aýǵanstan Islam Respýblıkasyn turaqtandyrý men qalpyna keltirý jónindegi kúsh-jigerlerge Frantsýz Respýblıkasy Qarýly Kúshteriniń qatysýyna baılanysty Qazaqstan Respýblıkasynyń aýmaǵy arqyly áskerı múlik pen personaldyń tranzıtin qamtamasyz etý týraly kelisimdi ratıfıkatsııalaý týraly», «Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy 1994 jylǵy 10 jeltoqsandaǵy Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy «Baıqońyr» keshenin jalǵa berý shartyna ózgeris engizý týraly hattamany ratıfıkatsııalaý týraly», «Zııatkerlik menshik quqyqtaryn qorǵaý men saqtaý salasyndaǵy biryńǵaı retteý qaǵıdattary týraly kelisimdi ratıfıkatsııalaý týraly», «Keden odaǵy sheńberindegi daýlar boıynsha sharýashylyq júrgizýshi sýbektilerdiń Eýrazııalyq ekonomıkalyq qoǵamdastyqtyń Sotyna júginýi jáne olar boıynsha sot isin júrgizý erekshelikteri týraly shartty ratıfıkatsııalaý týraly», «Qazaqstan Respýblıkasy men Halyqaralyq qaıta qurý jáne damý banki arasyndaǵy qaryz týraly kelisimdi (Tehnıkalyq jáne kásiptik bilim berýdi jańǵyrtý jobasy) ratıfıkatsııalaý týraly» zań jobalary bar.
Áleýmettik-mádenı damý komıteti«Halyqtyń kóshi-qony týraly» jáne «Qazaqstan Respýblıkasynyń keıbir zańnamalyq aktilerine halyqtyń kóshi-qony máseleleri boıynsha ózgerister men tolyqtyrýlar engizý týraly»zań jobalaryn ekinshi oqylymda kún tártibine engizýge daıyn ekenin málimdedi.
Sonymen qatar Zańnama jáne sot-quqyqtyq reforma «Qazaqstan Respýblıkasynyń keıbir zańnamalyq aktilerine qylmystyq jáne qylmystyq is júrgizý zańnamasyn jetildirý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda talqyǵa salýdy usynyp otyr.
Bıýro otyrysynda Májilistiń zań shyǵarmashylyq isine qatysty basqa da máseleler qaraldy.
