Májilis bıýrosynda aldaǵy jalpy otyrysta qaralatyn kún tártibiniń jobasy naqtylandy
ASTANA. QazAqparat - Búgin Qazaqstan Respýblıkasy Parlamenti besinshi shaqyrylymynyń tórtinshi sessııasy óz jumysyn bastady.
Májilis Tóraǵasy Qabıbolla Jaqypovtyń jetekshiliginde alǵashqy Bıýro otyrysy ótti. Onda Palatanyń aldaǵy jalpy otyrysynda qaralatyn kún tártibiniń jobasy naqtylandy, dep habarlady palatanyń baspasóz qyzmeti.
Depýtattar Halyqaralyq ister, qorǵanys jáne qaýipsizdik komıteti usynǵan «Damýǵa resmı kómek týraly» zań jobasyna ilespe túzetýlerimen qorytyndy ázirleý mezgilin naqtylaıdy. Sonymen qatar «Qazaqstan Respýblıkasy men Reseı Federatsııasy arasyndaǵy XXI ǵasyrdaǵy tatý kórshilik jáne odaqtastyq týraly shart» pen «Qazaqstan Respýblıkasy men Reseı Federatsııasy arasyndaǵy Qazaqstan Respýblıkasy azamattarynyń Reseı Federatsııasynyń aýmaǵynda jáne Reseı Federatsııasy azamattarynyń Qazaqstan Respýblıkasynyń aýmaǵynda bolý tártibi týraly kelisimdi ratıfıkatsııalaý týraly» zań jobalaryna qatysty máselelerdi de aldaǵy jalpy otyrysta qaraıdy.
Ekonomıkalyq reforma jáne óńirlik damý komıtetiniń usynysymen «Qazaqstan Respýblıkasynyń keıbir zańnamalyq aktilerine sýmen jabdyqtaý jáne sý burý máseleleri boıynsha ózgerister men tolyqtyrýlar engizý týraly» zań jobasyna jáne de Áleýmettik-mádenı damý komıtetiniń Qazaqstan Respýblıkasynyń keıbir zańnamalyq aktilerine derbes bilim berý uıymdarynyń qyzmetin retteý máseleleri boıynsha ózgerister men tolyqtyrýlar engizý týraly» zańynyń jobalary boıynsha qorytyndy ázirleý ýaqyty belgilenedi.
Ekologııa máseleleri jáne tabıǵat paıdalaný komıteti «Energııa únemdeý jáne energııa tıimdiligin arttyrý týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań jobasyna qorytyndy ázirleý mezgilin naqtylaýdy surady.
Sondaı-aq, Bıýroda Bishkek qalasynda ótetin Qazaqstan Respýblıkasy Parlamentiniń Májilisi men Qyrǵyz Respýblıkasynyń Jogorký Keneshi arasyndaǵy yntymaqtastyq jónindegi parlamentaralyq komıssııanyń tórtinshi otyrysynyń jumysyna qatysý týraly másele de qaraldy.
