Májilis bıýrosy jalpy otyrystyń kún tártibin naqtylady
ASTANA. QazAqparat - Búgin QR Parlamenti Májilisiniń tóraǵasy Nurlan Nyǵmatýlınniń tóraǵalyǵymen ótken palatanyń bıýro otyrysynda aldaǵy jalpy otyrystyń kún tártibi naqtylandy. Bul týraly Májilistiń baspasóz qyzmetinen málim etti, dep habarlaıdy QazAqparat.
«Onda depýtattar Ákimshilik quqyq buzýshylyq týraly kodekske túzetýlerge qatysty Zań jobasyn birinshi oqylymda talqylaıdy. Ol ákimshilik aıyppuldardyń mólsherin tómendetýge, eskertý sharalarynyń qoldanys aıasyn keńeıtip, jazalardyń túrin paıdaly arnaǵa burýǵa baǵyttalǵan. Jalpy alǵanda ákimshilik-delıktilik zańnamany odan ári izgilendirýge negizdelgen. Sondaı-aq osy kúni turǵyn úı qatynastary máselelerine qatysty ózgerister ekinshi oqylymda qaralatyn bolady», - delingen taratylǵan aqparatta.
Baspasóz qyzmetiniń málimetinshe, jalpy otyrysta depýtattar nazaryna Qazaqstan men Azyq-túlik qaýipsizdigi jónindegi Islam Uıymy arasyndaǵy shtab-páter týraly kelisimdi ratıfıkatsııalaýǵa qatysty Zań jobasy usynylady.
Sonymen qatar sol kúni palata birqatar zań jobalaryn jumysqa qabyldaıdy. Olardyń ishinde halyqtyń jumyspen qamtylýy jáne kóshi-qony máselesi, Túrikmenstanmen strategııalyq áriptestik shartty jáne 2014 jylǵy 29 mamyrdaǵy Eýrazııalyq ekonomıkalyq odaq týraly shartqa Qyrǵyz Respýblıkasynyń qosylýy týraly 2014 jylǵy 23 jeltoqsanda qol qoıylǵan sharttyń jekelegen erejelerin qoldaný týraly hattamany ratıfıkatsııalaýǵa baılanysty zań jobalary bar.
