Májilis Bıýrosy: TMD sheńberinde qupııa aqparatty qorǵaý týraly kelisimdi ratıfıkatsııalaýǵa qatysty zań jobasy jalpy otyrysqa usynyldy

ASTANA. QazAqparat - Búgin Qabıbolla Jaqypovtyń tóraǵalyǵymen Májilis Bıýrosy ótip, onda Palatanyń aldaǵy jalpy otyrysynda qaralatyn kún tártibiniń jobasy naqtylandy, dep habarlady Májilistiń Baspasóz qyzmetinen.

Depýtattar talqysyna 2004 jylǵy 19 qańtardaǵy Qazaqstan men Belarýs úkimetteri arasyndaǵy halyqaralyq avtomobıl qatynasy týraly kelisimge ózgerister engizý týraly hattamany, sondaı-aq, TMD sheńberinde qupııa aqparatty qorǵaý týraly kelisimdi ratıfıkatsııalaýǵa qatysty zań jobalary usynylady.

Depýtattar halyqaralyq teńiz uıymynyń aýdıtinen ótý máseleleri boıynsha zańnamalyq túzetýlerdi ekinshi oqylymda qaraıdy. Sonymen birge, osy kúni Palata 2000-jylǵy 7-shildedegi Qazaqstan men Ózbekstan úkimetteri arasyndaǵy azamattardyń ózara saparlarynyń sharttary týraly kelisimge ózgerister men tolyqtyrýlar engizý týraly hattamany ratıfıkatsııalaýǵa qatysty beıindi komıtetke qorytyndy ázirleý merzimin belgileýdi tapsyrady.