Májilis Bıýrosy Palatanyń jalpy otyrysynyń kún tártibin aıqyndady
ASTANA. Jeltoqsannyń 4-i. QazAqparat - Búgin QR Parlamenti Májilisiniń Tóraǵasy Oral Muhamedjanovtyń jetekshiligimen Palata Bıýrosynyń kezekti otyrysy ótti,
dep habarlaıdy QazAqparat.
Bıýro otyrysynda Palatanyń salalyq komıtetteriniń usynysymen Májilistiń jalpy otyrysynyń kún tártibi jobasyna shyǵarylatyn zań jobalary saralandy. Palatanyń kelesi otyrysyndaEkonomıkalyq reforma jáne óńirlik damý komıtetinen «Tabıǵı monopolııalar jáne retteletin naryqtar týraly» Zańǵa ózgerister men tolyqtyrýlar engizý týraly» jáne «Memlekettik statıstıka týraly» Qazaqstan Respýblıkasy Zańynyń jobasy (jańa redaktsııasy) ekinshi oqylymda qaralatyn boldy.
Sondaı-aq, salalyq komıtetter kún tártibine «Qazaqstan Respýblıkasynyń Úkimeti men Armenııa Respýblıkasynyń Úkimeti arasyndaǵy Investıtsııalardy kótermeleý jáne ózara qorǵaý týraly kelisimdi ratıfıkatsııalaý týraly», «Memlekettik múlik týraly» jáne «Qazaqstan Respýblıkasynyń keıbir zańnamalyq aktilerine memlekettik múlik máseleleri boıynsha ózgerister men tolyqtyrýlar engizý týraly» zańdarynyń jobalarymen jumysty jalǵastyrý jóninde máseleler usynyp otyr.
Kún tártibinde «Qazaqstan Respýblıkasynyń keıbir zańnamalyq aktilerine mindetti jáne ózara saqtandyrý, salyq salý máseleleri boıynsha ózgerister men tolyqtyrýlar engizý týraly» jáne «Qazaqstan Respýblıkasynyń keıbir zańnamalyq aktilerine keden isi máseleleri boıynsha ózgerister men tolyqtyrýlar engizý týraly» Zańdarynyń jobalaryna Senat engizgen túzetýler jóninde talqylanatyn bolady.
Usynylyp otyrǵan kún tártibinde «Qazaqstan Respýblıkasyndaǵy sot-saraptama qyzmeti týraly» jáne «Qazaqstan Respýblıkasynyń keıbir zańnamalyq aktilerine sot-saraptama qyzmeti máseleleri boıynsha ózgerister men tolyqtyrýlar engizý týraly» Zańdarynyń jobalary boıynsha Májilis pen Senat arasyndaǵy kelispeýshilikti eńserý jónindegi kelisim komıssııalarynyń usynystary da bar.
Bıýro otyrysynda parlamentshilerdiń Germanııadaǵy Qazaqstan jylynyń saltanatty jabylýyna arnalǵan is-sharalarǵa qatysýy týraly másele naqtylandy.
