Májilis Bıýrosy palatanyń aldaǵy otyrysy boıynsha kún tártibin bekitti
ASTANA. 24 mamyr. QazAqparat - Búgin Májiliste Palata Spıkeri Nurlan Nyǵmatýlınniń tóraǵalyǵymen Bıýro otyrysy ótti. Onda aldaǵy bolatyn jalpy otyrystyń kún tártibi bekitildi. Bul týraly Májilistiń baspasóz qyzmetinen habarlandy.
Bıýro usynysyna sáıkes, depýtattardyń qaraýyna bir top qujat usynylady. Atap aıtqanda, májilismender Qazaqstan men Chehııa arasyndaǵy ınvestıtsııalardy kótermeleý jáne ózara qorǵaý týraly, Qazaqstan men Qytaı arasyndaǵy gaz qubyryn salý men paıdalanýdaǵy yntymaqtastyq, sondaı-aq, Qazaqstan men Reseı arasyndaǵy dostyq, yntymaqtastyq jáne ózara kómek týraly Sharttarǵa túzetýler engizetin zań jobalaryn talqylaıtyn bolady.
Budan bólek, ekinshi oqylymda memlekettiń kepildik berilgen zań kómegin usyný júıesin jetildirýge baǵyttalǵan zań jobasy, jańartylatyn energııa kózderin paıdalanýdy qoldaý máseleleri boıynsha túzetýler engizilgen qujattar shyǵarylmaqshy.
Jalpy otyrystyń kún tártibine Qazaqstan men Lıýksembýrg arasyndaǵy tabys pen kapıtalǵa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly konventsııaǵa qorytyndy ázirleý mezgili de naqtylanady.
