Májilis Bıýrosy palata otyrysynyń kún tártibin aıqyndady
ASTANA. 15 aqpan. QazAqparat - Búgin Májiliste Palata Spıkeri Nurlan Nyǵmatýlınniń tóraǵalyǵymen Bıýro otyrysy bolyp ótti.
Onda aldaǵy ótetin jalpy otyrystyń kún tártibiniń jobasy qaraldy. Bul týraly Májilistiń baspasóz qyzmetinen habarlandy.
Bıýro bekitken kún tártibine sáıkes, depýtattardyń talqylaýyna «Memleket kepildik bergen zań kómegi týraly» zań jobasy birinshi oqylymǵa shyǵarylatyn bolady. Sonymen birge, halyq qalaýlylarynyń qaraýyna birinshi oqylymǵa «Qazaqstan Respýblıkasynyń keıbir zańnamalyq aktilerine memlekettiń kepildik berilgen zań kómegin usynýy júıesin jetildirý máseleleri boıynsha ózgerister men tolyqtyrýlar engizý týraly» zań jobasy usynylatyn bolady.
Sondaı-aq, Bıýro otyrysynda Memleket Basshysy N. Nazarbaevtyń zań shyǵarý jumysyndaǵy basymdyqtar jaıyndaǵy tapsyrmasyna nazar aýdarylyp, komıtet tóraǵalary men Májilis apparatyna zań jobalarynyń sapasyna basa nazar aýdarý tapsyryldy.
