Májilis Bıýrosy: Palata otyrysynyń kún tártibi anyqtaldy
ASTANA. Qyrkúıektiń 24-i. QazAqparat - Búgin QR Parlamenti Májilisiniń Tóraǵasy Oral Muhamedjanovtyń jetekshiligimen Palata Bıýrosynyń kezekti otyrysy ótti.
Onda Májilistiń salalyq komıtetteriniń usynýymen aldaǵy aptada ótetin jalpy otyrystyń kún tártibine usynylatyn máseleler qaraldy.
Depýtattardyń talqysyna birqatar halyqaralyq qujattardy bekitýdi kózdeıtin zań jobalary usynylatyn boldy. Atap aıtqanda, «Olımpıada rámizin qorǵaý týraly Naırobı shartyn ratıfıkatsııalaý týraly», «Qazaqstan Respýblıkasynyń Úkimeti men Slovenııa Respýblıkasynyń Úkimeti arasyndaǵy Jolaýshylar men júkterdiń avtomobıl kóligimen halyqaralyq tasymaldary týraly kelisimdi ratıfıkatsııalaý týraly» zań jobalary Palatanyń jalpy otyrysynyń kún tártibine usynyldy. Sonymen qatar «Qazaqstan Respýblıkasynyń Úkimeti, Qyrǵyz Respýblıkasynyń Úkimeti, Tájikstan Respýblıkasynyń Úkimeti, Túrikmenstannyń Úkimeti jáne Ózbekstan Respýblıkasynyń Úkimeti arasyndaǵy Halyqaralyq Araldy qutqarý Qorynyń (HAQQ) jáne onyń uıymdarynyń mártebesi týraly kelisimdi ratıfıkatsııalaý týraly» zań jobasynyń talqyǵa salynýy qarastyrylyp otyr.
Sondaı-aq jalpy otyrysta «Qazaqstan Respýblıkasynyń keıbir zańnamalyq aktilerine elektrondyq aqsha máseleleri boıynsha tolyqtyrýlar engizý týraly» zań jobasymen jumysty jalǵastyrý máselesi qaralady.
Bıýro otyrysynda «Bıootyn óndirisin jáne aınalymyn memlekettik retteý týraly» jáne elimizdiń keıbir zańnamalyq aktilerine bıootyn óndirisin jáne aınalymyn memlekettik retteý máseleleri boıynsha túzetýler engizýdi kózdeıtin zań jobasy boıynsha Májilis pen Senat arasyndaǵy kelisim komıssııasynyń usynystary týraly jáne basqa da máseleler qaraldy.
