Májilis Bıýrosy: Kún tártibi naqtylandy
ASTANA. QazAqparat - Búgin Parlament Májilisiniń spıkeri Baqtyqoja Іzmuhambetovtiń tóraǵalyǵymen Májilis Bıýrosy ótip, aldaǵy jalpy otyrystyń kún tártibi naqtylandy.
Onda depýtattar talqysyna Makedonııamen ınvestıtsııalardy kótermeleý jáne ózara qorǵaý týraly úkimetaralyq kelisimdi ratıfıkatsııalaý týraly zań jobasy usynylyp otyr.
Bul kelisimge 2012 jyly 2 shildede Makedonııa Respýblıkasy Prezıdentiniń bizdiń elimizge resmı sapary kezinde qol jetkizilgen. Ol qos memlekettiń ınvestıtsııalyq ahýalyn jaqsartýǵa jáne ózara saýda-ekonomıkalyq yntymaqtastyqty odan ári nyǵaıtýǵa yqpal etedi.
Sondaı-aq jalpy otyrysta ilespeli qujatpen «Jaıylymdar týraly» zań jobasy boıynsha beıindi komıtetke qorytyndy ázirleý merzimin taǵaıyndaý jóninde qaýly qabyldanbaq.
Atalǵan zań jobasy tikeleı Májilis depýtattary bastamashylyǵymen ázirlengen. Onda elimizdiń jaıylymdyq jerlerinde oryn alyp otyrǵan olqylyqtar eskerilip, tıimdi basqarý tetikteri qarastyrylady.
