Májilis bıýrosy aldaǵy palata otyrysynyń kún tártibin naqtylady
ASTANA. 14 jeltoqsan. QazAqparat -Búgin Parlament Májilisiniń spıkeri Nurlan Nyǵmatýlınniń jetekshiligimen ótken Palata Bıýrosynda depýtattardyń aldaǵy ótetin jalpy otyrysynda qaralatyn kún tártibi naqtylandy.
Bul týraly Májilistiń baspasóz qyzmetinen habarlandy.
Kún tártibiniń jobasyna salalyq komıtetter qorytyndy ázirleý ýaqytyn naqtylaý úshin Úkimetten kelip túsken zań jobalarynyń bir toby qosyldy.
Osy topta Keden odaǵynda tarıftik emes retteý sharalaryn qoldaný men adam saýdasyna qarsy is-qımyl máselelerine túzetýler qaralatyn bolady. Sonymen birge, memlekettik-jekemenshik áriptestiktiń jańa nysandaryn engizý jáne olardyń qoldanylý salalaryn keńeıtý, sondaı-aq qyzmetter kórsetý máseleleri boıynsha ózgerister men tolyqtyrýlar engizý týraly zań jobalary ilespe túzetýlerimen engizildi.
Parlament Májilisiniń tóraǵasy Nurlan Nyǵmatýlın salalyq komıtetterge osy máselelermen qosymsha jumys isteýdi tapsyrdy.
