Májilis bıýrosy 2014 jylǵy alǵashqy jalpy otyrysta qaralatyn máselelerdi belgiledi
ASTANA. 6 qańtar. QazAqparat - Palata bıýrosy 8 qańtar kúni QR Parlamenti Májilisiniń jalpy otyrysynda qaralatyn birqatar máselelerdi usyndy.
Atap aıtqanda, «Túrkitildes memleketterdiń yntymaqtastyq keńesi Hatshylyǵynyń qarjylyq qaǵıdalary týraly kelisimdi ratıfıkatsııalaý týraly» Qazaqstan Respýblıkasy Zańynyń jobasy boıynsha qorytyndy ázirleý taqyrybymen Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev baıandama jasaıtyn bolady.
Al Qarjy jáne bıýdjet komıtetiniń tóraıymy Gúljan Qaraqusova «Qazaqstan Respýblıkasynyń keıbir zańnamalyq aktilerine Keden odaǵynyń kedendik shekarasy arqyly avtomobıl ótkizý pýnktterinde veterınarııalyq-sanıtarııalyq baqylaý jáne ósimdikter karantıni boıynsha baqylaý fýnktsııalaryn keden organdaryna berý máselesi boıynsha ózgerister men tolyqtyrýlar engizý týraly» QR Zańynyń jobasy boıynsha qorytyndy ázirleý máselesin kóteredi.
«Bernde 1999 jylǵy 21 qazanda qol qoıylǵan Qazaqstan Respýblıkasynyń Úkimeti men Shveıtsarııa Federaldyq Keńesi arasyndaǵy Tabys pen kapıtalǵa salynatyn salyqtarǵa qatysty qosarlanǵan salyq salýdy boldyrmaý týraly konventsııaǵa jáne Hattamaǵa ózgerister men tolyqtyrýlar engizý týraly Qazaqstan Respýblıkasynyń Úkimeti men Shveıtsarııa Federaldyq Keńesi arasyndaǵy Hattamany ratıfıkatsııalaý týraly» QR Zańynyń jobasy jóninde QR Premer-Mınıstriniń orynbasary - Qarjy mınıstri Baqyt Sultanov sóz sóıleıdi. Qosymsha baıandamany Halyqaralyq ister, qorǵanys jáne qaýipsizdik komıtetiniń múshesi Ersultan Bekturǵanov jasaıtyn bolady.
Sonymen qatar QR Qarjy vıtse-mınıstri Rýslan Dálenov «Qazaqstan Respýblıkasy men Eýropa Qaıta Qurý jáne Damý Banki arasyndaǵy yntymaqtastyq pen Eýropa Qaıta Qurý jáne Damý Bankiniń QR qyzmetine qatysty kelisimdi ratıfıkatsııalaý týraly» QR Zańynyń jobasyn, Halyqaralyq ister, qorǵanys jáne qaýipsizdik komıtetiniń múshesi Úsengeldi Medeýov pen Zańnama jáne sot-quqyqtyq reforma komıtetiniń múshesi Olga Kıkolenko «Qazaqstan Respýblıkasynyń keıbir zańnamalyq aktilerine turmystyq zorlyq-zombylyqqa qarsy is-qımyl máseleleri boıynsha ózgerister men tolyqtyrýlar engizý týraly» QR Zańynyń jobasyn (ekinshi oqylym) tanystyrady.
