Májilis bıýdjet zańnamasyn jetildirýge baǵyttalǵan zań jobasyn maquldady
ASTANA. 23 qazan. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine bıýdjet zańnamasyn jetildirý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy.
Atalǵan zań jobasy Memleket basshysynyń Joldaýynda júktelgen mindetterdi júzege asyrýǵa baǵyttalady jáne jańa bıýdjet saıasaty men nátıjelerge baǵdarlanǵan memlekettik josparlaý júıesin jetildirý maqsatynda ázirlengen. Bul rette jergilikti bıýdjetterdi qalyptastyrý, bıýdjettik josparlaý, bıýdjettik ınvestıtsııalar, bıýdjettik baǵdarlamalar ákimshileriniń jaýapkershiligi qarastyrylady.
Atap aıtqanda, turaqty sıpattaǵy transfertterdiń jergilikti bıýdjet shyǵystarynyń bazasyna berilýine baılanysty, jekelegen sharalardy jergilikti bıýdjetten qarjylandyrýdyń eń tómengi kólemderin engizý usynylady. Bul ákimderdiń qarajattardy basqa maqsattarǵa paıdalanýyna jáne jekelegen áleýmettik mańyzy bar salalardyń jergilikti bıýdjetten tolyq qarjylandyrylmaýyna jol bermeıtin bolady. Osy rette jergilikti bıýdjetten belgilengen eń tómengi kólemderden az qarajat bólingen jaǵdaıda ákimderdiń tártiptik jaýapkershiligi, sonymen qatar tolyq qarjylandyrylmaǵan somany joǵary turǵan bıýdjetke mindetti túrde qaıtarýy belgilenedi.
Májilis maquldaǵan zań jobasy Parlament Senatyna joldanady.
