Májilis bolmaǵan jaǵdaıda Parlamenttiń qyzmetin Senat atqara beretin bolady - Q. Toqaev
ASTANA. QazAqparat - Májilis bolmaǵan jaǵdaıda Parlamenttiń qyzmetin Senat atqara beretin bolady. Búgin Parlament Senatynyń jalpy otyrysynda spıker Qasym-Jomart Toqaev QR Prezıdenti Nursultan Nazarbaevtyń Májilistiń qyzmetin merziminen buryn toqtatyp, saılaý taǵaıyndaý týraly Jarlyǵyna qatysty pikirin osylaı bildirdi.
«QR Prezıdenti keshe Parlament Májilisin merziminen buryn taratyp, Májilis pen barlyq deńgeıdegi máslıhattar saılaýyn ótkizý týraly Jarlyǵyna qol qoıdy. Elbasynyń bul sheshimi qoǵam men memleket úshin asa mańyzdy bolyp tabylady. Sonymen qatar, bul asa ózekti reformalardy júzege asyrýǵa jedel kirisip, daǵdarysqa qarsy sharalarǵa jańa serpin beretini sózsiz. Elbasynyń aýqymdy reformalaryn naqty júzege asyrýǵa kirisken kezeńde saıası partııalardyń saılaýshylardan jańa senim mandatyn alýy óte mańyzdy», dedi Q. Toqaev.
Sonymen qatar, spıker búgingi tańda Senattyń aldynda asa jaýapty mindetter turǵanyn atap ótti. «Konstıtýtsııaǵa sáıkes, Májilis ýaqytsha bolmaǵan kezde Parlamenttiń zań shyǵarý qyzmetin Senat atqaratyn bolady. Elbasynyń Ult josparyn zańnamalyq turǵydan qamtamasyz etý úshin Senat Úkimetpen birlesip aýqymdy jumystardy úılesimdi túrde jalǵastyratyn bolady. Senatorlar qoǵam men memlekettiń turaqty damýyna asa qajetti zańdardy qabyldaýda ózderiniń mol tájirıbesin aıanbaı jumsaıtynyna senim mol», dedi Q. Toqaev.
