Májilis bitimgershilik qyzmettiń qaǵıdattaryn aıqyndaıtyn qujatty maquldady
ASTANA. QazAqparat - Búgin Parlament Májilisiniń jalpy otyrysynda «Bitimgershilik qyzmet týraly» zań jobasy ekinshi oqylymda maquldandy.
Qazaqstannyń qabyldaǵan halyqaralyq mindettemelerine sáıkes, QR ulttyq kontıngentiniń beıbitshilik pen qaýipsizdikti qoldaý jónindegi operatsııalarǵa (mıssııalarǵa) qatysýyna baılanysty qoǵamdyq qatynastardy retteýge baǵyttalǵan. Sonymen qatar, qujatta Qazaqstan bitimgershilik qyzmetiniń qaǵıdattary, maqsattary men mindetterin aıqyndalady. Budan bólek, zań jobasynda QR Prezıdentiniń, Úkimetiniń, Qorǵanys mınıstrligi jáne basqa da memlekettik organdardyń bitimgershilik qyzmet salasyndaǵy quzyretteri belgilenedi.
Tutastaı alǵanda, qujatty qabyldaý birqatar múmkindikterge qol jetkizetin bolady. Atap aıtqanda, Qazaqstannyń álemdik saıası sahnadaǵy halyqaralyq bedelin arttyrýǵa jáne elimizdiń halyqaralyq uıymdar men qaýymdastyqtardaǵy múddelerin qorǵaýǵa septigin tıgizedi. Budan bólek, basqa elderdiń áskerı jáne azamattyq personalmen tıimdi qarym-qatynas ornatý jáne áriptestikti nyǵaıtý qarastyrylady.
Zań jobasynda ulttyq kontıngentti áleýmettik qorǵaý sharalary, onyń quqyqtary men mindetteri aıqyndalǵan. «Zań jobasyn ekinshi oqylymǵa daıyndaý barysynda onyń taqyrybyn ózgertý jónindegi túzetýler engizildi. Quqyqtyq olqylyqtardy joıý maqsatynda jáne memlekettik organdardyń, uıymdardyń bitimgershilik operatsııalarǵa qatysatyn qyzmetkerleri men qyzmetkerlerge beriletin kepildikterdi bekitý úshin Qazaqstan Respýblıkasynyń Eńbek kodeksine tıisti normalar engizildi»,-dedi depýtat Abaı Tasbolatov.
Májilis maquldaǵan zań jobasy Parlament Senatyna joldanady.
