Májilis «Bitimgershilik qyzmet týraly» zań jobasyn birinshi oqylymda maquldady
Zań jobasy Qazaqstannyń qabyldaǵan halyqaralyq mindettemelerine sáıkes, QR ulttyq kontıngentiniń beıbitshilik pen qaýipsizdikti qoldaý jónindegi operatsııalarǵa (mıssııalarǵa) qatysýyna baılanysty qoǵamdyq qatynastardy retteýge baǵyttalǵan. Sonymen qatar, qujatta Qazaqstan bitimgershilik qyzmetiniń qaǵıdattary, maqsattary men mindetterin aıqyndalady. Budan bólek, zań jobasynda QR Prezıdentiniń, Úkimetiniń, Qorǵanys mınıstrligi jáne basqa da memlekettik organdardyń bitimgershilik qyzmet salasyndaǵy quzyretteri belgilenedi.
QR Qorǵanys mınıstriniń orynbasary Talǵat Muhtarovtyń aıtýynsha, qujatty qabyldaý birqatar múmkindikterge qol jetkizetin bolady.
Atap aıtqanda, Qazaqstannyń álemdik saıası sahnadaǵy halyqaralyq bedelin arttyrýǵa jáne elimizdiń halyqaralyq uıymdar men qaýymdastyqtardaǵy múddelerin qorǵaýǵa septigin tıgizedi. Budan bólek, basqa elderdiń áskerı jáne azamattyq personalmen tıimdi qarym-qatynas ornatý jáne áriptestikti nyǵaıtý qarastyrylady.
«Qarýly kúshterdi, basqa memlekettik organdardy el qaýipsizdigin qorǵaýǵa, tómen jáne orta qarqyndy qaqtyǵystardyń aldyn alýǵa, áskerı qaqtyǵystardan zardap shekken tulǵalardy, turǵyndardy, bosqyndardy azyq-túlikpen, dári-dármekpen qamtamasyz etýge daıyndap, osy jolda jınalǵan tájirıbeni áskerı qyzmetshilerdiń áskerı daıyndyq baǵdarlamasyna engizý», - dedi Talǵat Muhtarov.
Onyń sózine qaraǵanda, Qazaqstannyń ulttyq kontıngenti Úkimet bekitken bitimgershilik operatsııalaryna daıyndyq qaǵıdalaryna sáıkes oqytýdan jáne daıarlyqtan ótedi. Zań jobasynda ulttyq kontıngentti áleýmettik qorǵaý sharalary, onyń quqyqtary men mindetteri aıqyndalyp otyr.