Májilis bırjalyq saýda týraly zań jobasyn birinshi oqylymda maquldady
«Joba taýar bırjalarynyń qyzmetin retteýdi zańnamalyq jetildirý boıynsha Memleket basshysynyń 2020 jylǵy 1 qyrkúıektegi Joldaýyn iske asyrý jónindegi Jalpyulttyq is-sharalar josparynyń 46-tarmaǵyn oryndaý úshin ázirlendi. Zań jobasynda zańnamalyq bazany halyqaralyq talaptar men standarttarǵa sáıkes keltirý, sondaı-aq bırjalyq saýdany damytý boıynsha tolyqtyrýlar kesheni kózdelgen. Olardy iske asyrý ornyqty jáne básekege qabiletti otandyq bırjalyq salany qalyptastyrýǵa múmkindik beredi.
«Bırja saýdanyń mańyzdy ekojúıesi bolyp sanalady. Onyń negizgi faktory bırjalyq ınfraqurylymmen qamtamasyz etilgen senimdilik bolyp otyr. Qoldanystaǵy tetikter bırjalyq saýdadaǵy jetkizýshilerdiń jaýapkershiligin kózdemeıdi. Búgin kepildik ári saqtandyrý qorlary taýar bırjasynyń jáne osy taýar bırjasynda akkredıttelgen brokerlerdiń qarjy resýrstarynan qalyptastyrylady. Sondyqtan osy zań jobasy aıasynda bırjadaǵy kelisimderdi saqtandyrýdy engizý múmkindigi qarastyryldy. Bul standartty jáne qosarlanǵan qarsy aýktsıon rejımderinde iske asyrylatyn bolady», - dedi Saýda jáne ıntegratsııa mınıstri Baqyt Sultanov.
Onyń aıtýynsha, kelisimderdiń jasalýyn jáne sharttardyń oryndalýyn saqtandyrý quralyn engizý barlyq qatysýshylardyń táýekelderin azaıtady, olardyń jaýapkershilik deńgeıin ári bırjalyq saýdanyń tartymdylyǵyn arttyrady.
«Sondaı-aq, Zań jobasynda mınıstrlikke
eń tómengi qarjylyq turaqtylyqtyń shegin belgileý boıynsha quzyret berý usynylady. Usynylǵan qural novella emes. Bul praktıka shet elderde, máselen, AQSh, Ulybrıtanııa, Almanııa, Sıngapýr, sondaı-aq memlekettik satyp alýdyń ulttyq júıesinde qoldanylady. Bul shara ótkiziletin saýda-sattyqtardyń sapasyn arttyrýǵa múmkindik beredi, kelisimder qaýipsizdiginiń qosymsha quraly bolyp sanalady, potentsıaly dármensiz ónim berýshiler shegeriledi, sondaı-aq bırjalyq saýdaǵa qatysýǵa múddeli tulǵalardyń «kóleńkeden» shyǵýyn yntalandyrady», - dedi vedomstvo basshysy.
Onyń sózine qaraǵanda, zańnamaǵa osy tolyqtyrýlardy engizý:
– bırjalyq saýdanyń turaqty naryǵyn qalyptastyrýǵa;
– qol jetimdilik pen adal básekelestikti arttyrýǵa;
– satýshylar men satyp alýshylar tarapynan brokerler men bırjaǵa yqtımal áser men qysymdy boldyrmaýǵa;
– brokerlerdi bırjalyq saýdaǵa jańa jetkizýshiler men satyp alýshylardy, sonyń ishinde sheteldik satyp alýshylardy yntalandyrýǵa;
– bırjalyq saýda kólemin 5,6 trln teńgege deıin ulǵaıtýǵa;
– kóterme saýdanyń jalpy kólemindegi bırjalyq saýdanyń úlesin 14%-ke deıin ulǵaıtýǵa;
– tabıǵı baǵany belgileýge jáne bırjalyq kelisimderdiń ashyqtyǵyn qamtamasyz etýge múmkindik beredi.
Budan buryn habarlanǵandaı, qazirgi ýaqytta Qazaqstanda 19 taýar bırjasy lıtsenzııalanǵan.
Sonymen qatar, Qazaqstanda bırjalyq saýdanyń Biryńǵaı qaǵıdalary bekitilmek.
