Májilis Biryńǵaı ekonomıkalyq keńistikte munaı ónimderiniń ortaq naryǵyn qalyptastyrýǵa baǵyttalǵan jobany maquldady
ASTANA. 30 naýryz. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Belarýs Respýblıkasy, Qazaqstan Respýblıkasy men Reseı Federatsııasynyń munaı men munaı ónimderiniń ortaq naryǵyn uıymdastyrý, basqarý, olardyń jumys isteý jáne damý tártibi týraly kelisimdi ratıfıkatsııalaý týraly» zań jobasyn maquldady.
Atalǵan kelisimge 2010 jylǵy 9 jeltoqsanda Máskeý qalasynda qol qoıylǵan bolatyn. «Kelisimniń maqsaty Biryńǵaı ekonomıkalyq keńistikke qatysýshy memleketterdiń munaı jáne munaı ónimderiniń ortaq naryǵyn qalyptastyrýǵa baǵyttalǵan negizgi qaǵıdattaryn aıqyndaý, sondaı-aq osy naryqtaǵy básekelestikti damytý bolyp tabylady. Úshjaqty kelisimniń erejeleri birqatar múmkindikterdi qamtyp otyr. Atap aıtqanda, taraptardyń ózara saýdasynda sandyq shekteýlerdi jáne kedendik áketý bajdaryn qoldanbaýǵa, Biryńǵaı ekonomıkalyq keńistikke qatysýshy memleketterdiń munaı men munaı ónimderine degen qajettilikterin basymdyqpen qanaǵattandyrýǵa múmkindikter ashylady. Budan bólek, munaı ónimderin tasymaldaýǵa tarıfter tarap memleketteriniń ulttyq zańnamasyna sáıkes belgilenedi. Memleketterdiń sharýashylyq júrgizý sýbektileri úshin munaı ónimderin tasymaldaýǵa arnalǵan tarıfter teń deńgeıde bolady. Budan bólek, taraptar kelisim sharttaryna sáıkes, birqatar sharalar keshenin júzege asyratyn bolady», - deıdi zań jobasy boıynsha baıandaǵan Munaı jáne gaz mınıstri Saýat Myńbaev. Onyń aıtýynsha, kelisimge sáıkes taraptardyń quzyretti organdary árbir aǵymdaǵy jyldyń 1 qazanyna deıin munaıdy jáne munaı ónimderin óndirýdiń, tutynýdyń, jetkizýdiń, ımporttaý men eksporttaýdyń kelesi jylyna arnalǵan ındıkatıvtik teńgerimderin kelisedi. BEK qatysýshy memleketterdiń munaı men munaı ónimderine arnalǵan normalaryn nemese standarttaryn birizdendirý sharasy qamtylady.
«Tutastaı alǵanda kelisim BEK-tiń munaı men munaı ónimderiniń ortaq naryqtaryn qalyptastyrý jónindegi sharalar keshenin júzege asyrýǵa múmkindik beredi», - dedi S. Myńbaev. Zań jobasyna sáıkes, taraptar birqatar negizgi qaǵıdattardy basshylyqqa alatyn bolady. Atap aıtqanda, taraptardyń ózara saýdada sandyq shekteýlerdi jáne ákelinetin kedendik bajdardy qoldanbaýy, ekologııalyq qaýipsizdikterdi qamtamasyz etýi, munaı men onyń ónimderiniń ortaq naryǵyn aqparattyq qamtamasyz etý júıesin qalyptastyrýy qarastyrylady.
Májilis maquldaǵan zań jobasy Parlament Senatyna jiberiledi.
